Tranebær

Det finst også viltveksande tranebær i Noreg, men dei amerikanske bæra som vert omtalte her, har ein søtare og meir delikat smak enn dei nordiske. Bæra som vert importerte frå Amerika og Canada, er større enn tyttebær og kan verte opptil to cm i diameter. Fasongen er rund eller oval, og fargen kan variera frå lysare raud til mørk raud. Fruktkjøtet er kvitrosa, og smaken er frisk og syrleg og minner om tyttebær. Bruksområda er dei same som for tyttebær.

Vi et ikkje tranebær naturelle då dei har ein hard konsistens og syrleg smak. Tranebær har omtrent same bruksområdet som tyttebær og kan kokast og nyttast i paiar eller sorbéar. Av tranebær vert det laga syltetøy, gelé, chutney og saus. Syltetøyet er nydeleg til kalkun. Tranebær kan også nyttast i patéar, i brød og i muffins. Tranebær eignar seg godt til frysing, og etter tining ser dei like gode ut som om dei var nyhausta.

Tranebær er proppfulle av antioksidantar (inkludert vitamin C) og mineral. Tranebær vert også nytta i førebygging og behandling av urinvegsinfeksjonar. Det vert i tillegg sagt at tranebær hemmar bakterien som forårsakar magesår, og at dei motverkar viruset som gir omgangssjuke.

Sjå Matvaretabellen frå Mattilsynet for nærare opplysningar om næringsinnhaldet.