Om filmen
Verda, og vi som lever her på jorda, står overfor store utfordringar når det gjeld miljø, klimaendringar, mat og ressursar. I Don't panic – The truth about population forklarer Hans Rosling på ein underhaldande måte korleis framtida til verda kanskje ikkje er så dyster som vi kanskje skulle tru.
Med nyskapande 3D-infografikk målar han eit levande bilete av ei verd som har endra seg på måtar vi knapt forstår – ofte til det betre.
"Edutainar"
Hans Rosling var lege og professor i internasjonal helse ved Institutt for folkehelsevitskap ved Karolinska Institutet i Sverige. Han blei kjend utanfor fagmiljøet sitt etter å ha heldt eit føredrag på den kjende TED-konferansen i 2006. Dette føredraget har blitt sett over 10 millionar gonger på YouTube og TED.com.
Han blei særleg kjend for å formidle utviklingsspørsmål og statistikk på ein enkel og underhaldande måte. I 2012 kom han på Time Magazine si liste over dei 100 personane med størst påverknad i verda. I 2014 blei han blant anna utnemnt til æresdoktor ved Universitetet i Oslo. Han døde i februar 2017, 68 år gammal.