Taksidermisten konserverer dyr og presenterer dei i eit naturleg miljø. Arbeidet går ut på å flå og behandle skinn, byggje opp ein kunstig kropp og trekkje skinnet på for å attskape dyret. Auga blir gjerne laga av glas eller plast.
For å få til eit naturleg uttrykk må du ha kunnskap om anatomien til dyra. Du bør òg kjenne levemåten til dyra for å plassere det utstoppa dyret inn i eit naturleg miljø.
Dyra som blir stoppa ut, blir brukte til utstillingar, som dekorasjonar, jaktrofé og læremiddel i skulen.
Eigenskapar
Som taksidermist må du ha evna til å observere detaljar, vere kreativ og ha god formsans. Det er òg viktig å meistre modellering, måle- og prepareringsteknikkar, og dessutan kunne ulike utstillingsteknikkar. Tolmod og nøyaktigheit er svært viktig som taksidermist.
Utdanning
Fleire fag innan tradisjonshandverk har ikkje eit skuletilbod, men opplæring i bedrift etter Vg1. Desse faga blir kalla særløp. Taksidermist er eitt av særløpa, der du går tre år i lære etter Vg1 handverk, design og produktutvikling. Fullført og bestått opplæring fører fram til sveinebrev. Yrkestittelen er taksidermist.
Relatert innhald
Nettside hos gyldendal.tv