Møbeltapetserarar jobbar med interiørsaum og stoppar og trekkjer møblar. Dei kan både restaurere og produsere møblar og interiørprodukt. Arbeidet er ofte spesialoppdrag som inneber mykje handarbeid, men også bruk av maskiner. Kundane er medvitne kring gjenbruk og kvalitet.
Møbeltapetserarar byggjer opp underlag, stoppar, skjer til stoff eller skinn og trekkjer møblar. I dette arbeidet er det viktig med riktig bruk av materiale og teknikkar. Oppdraga kan variere frå mindre interiørprodukt til avanserte restaureringsprosjekt.
Eigenskapar
Som møbeltapetserar bør du ha god form- og fargesans og kunnskapar om ulike materiale og stilartar. Fleksibilitet og nøyaktigheit er viktige eigenskapar.
Utdanning
Fleire fag innan design og tradisjonshandverk har ikkje eit skuletilbod, men opplæring i bedrift etter Vg1. Desse faga kallast særløp. Møbeltapetserar er eitt av særløpa, der du går tre år i lære etter Vg1 handverk, design og produktutvikling. Fullført og bestått opplæring fører fram til sveinebrev. Yrkestittelen er møbeltapetserar.
CC BY-SASkrive av Kristine Kandal-Ilagsmoen og Inger Gilje Sporaland.
Sist fagleg oppdatert 19.01.2023