Transport av gass og olje

Olje og gass som blir produsert frå reservoara under havbotnen, blir frakta anten i tankskip eller i røyr til mottakssentralar. Transportrøyra som ligg på havbotnen, er eit stort nettverk som fører produktet til fleire land i Europa.

Noko av olja som blir produsert offshore, blir frakta i røyr på havbotnen til Noreg og England, men det meste av olja blir lasta i tankskip og transportert til land. Olja blir levert til eit landanlegg, der ho blir raffinert til fleire ulike produkt, som kan brukast til ulike oppgåver. Raffineringa fører fram til gass, bensin, diesel, fyringsolje og asfalt. Produktet blir overført til ein terminal for vidare transport.

Frå terminalen blir produkta henta med tankbilar, som transporterer dei til bensinstasjonar eller til store anlegg som har behov for større mengder diesel. Sjåførane på desse tankbilane må ha godkjent ADR-kompetansebevis (grunnkurs for transport av farleg gods) med utvida kompetansebevis for tank. Tankbilane som fraktar olje- og gassprodukt, skal merkjast med oransje skilt som beskriv kva dei fraktar.

Dei raffinerte oljeprodukta kan òg lastast over i tankskip og førast til mottakarar i andre land eller andre hamner i Noreg.

Gassen frå reservoara må haldast i lukka røyrsystem slik at han ikkje blir blanda med lufta rundt oss. Gassen blir behandla i tørkeanlegg og komprimert slik at trykket stig til rundt 200 bar. Deretter går gassen gjennom transportrøyra på havbotnen til land. Røyra er rundt 30" i diameter (76 cm). Det betyr at mengda gass som blir transportert, er enorm.