Kontroll av transportavtale

Medan ein kjøpsavtale blir gjort mellom seljar og kjøpar, blir ein transportavtale gjort mellom avsendar og fraktførar, og han blir avslutta mellom mottakar og fraktførar. Det er derfor mottakaren som må kontrollere at transportavtalen er oppfylt.

Ein transportør – eller fraktførar, som vegfraktlova kallar transportøren – har erstatningsansvar for gods som blir skadd under transport. Erstatningsansvaret er ikkje avhengig av verdien på varene, men av vekta på godset. Derfor må vekta på det skadde eller manglande godset skrivast i merknadsrubrikken i fraktbrevet.

Nokon transportavtalar blir gjort med tidsgaranti, noko som betyr at vara skal leverast til ei tid som er avtalt på førehand. For å kontrollere at tidsgarantien er oppfylt, må mottakaren av godset notere tidspunktet sendinga blei levert, i merknadsrubrikken i fraktbrevet.

Viss godset har ein synleg skade når det blir levert, skal dette kommenterast i merknadsrubrikken i fraktbrevet og signerast. Helst bør sjåføren som leverer godset, òg signere i merknadsrubrikken. På den måten stadfestar sjåføren at skaden ikkje hadde skjedd då godset blei levert.