Tverrfagleg samarbeid sikrar at brukarar og pasientar får eit individuelt tilpassa og heilskapleg tenestetilbod fordi fagpersonar med ulik kompetanse kan arbeide saman mot eit felles mål.
Føresetnader for tverrfagleg samarbeid
For at det tverrfaglege samarbeidet skal fungere, er det viktig at dei alle dei involverte fagpersonane har ein trygg og tydeleg fagleg identitet frå yrket sitt. Fagkunnskapen til dei ulike fagpersonane må anerkjennast som likeverdig, og som helsefagarbeidar må du vere klar over kva som er innanfor kompetansen din, og kva andre yrkesgrupper kan bidra med. Det må derfor bli sett av tid til samarbeidsmøte og til utvikling av kompetanse om dei andre fagfelta.
Brukarmedverknad
Brukarmedverknad er sentralt i tverrfagleg samarbeid. Målet for arbeidet skal vere målet til brukaren, og det er viktig at dei ulike yrkesgruppene er klar over dette og arbeider mot same mål. Som helsefagarbeidar kan det vere vanskeleg å dekkje behovet til alle brukaren innanfor kompetanseområdet ditt, men i samarbeid med ulike fagpersonar med ulik innfallsvinkel er det enklare å sjå heilskapen og finne løysingar.
Behov for koordinering
Det tverrfaglege samarbeidet kan bestå av ulike fagpersonar innan helse- og omsorgstenestene, men òg frå andre sektorar som skule, Nav eller private tenestetilbod. For å sikre at brukaren får eit heilskapleg tilbod, er derfor koordinering av tenestene ein viktig del av det tverrfaglege samarbeidet, og då kan ein individuell plan vere eit nyttig verktøy.
Utfordringar til deg
- Kva yrkesgrupper samarbeider helsefagarbeidaren ofte med?
- Kva kompetanse kan du som helsefagarbeidar bidra med i samarbeid med andre yrkesgrupper?
- Kvifor er det viktig å tenkje på brukarmedverknad i eit tverrfagleg samarbeid?