Oppgåve
Regelverk om teieplikt
Teieplikta for helsepersonell heng saman med retten pasienten har til personvern. Fleire av lovene som regulerer helse- og omsorgstenestene, har føresegner som handlar om teieplikta.
Bilete: Dag Jenssen / CC BY-NC 4.0
Bruk fagartiklane i dette emnet og lenkjene til dei ulike lovene for å finne svar på spørsmåla.
- Kva lover har føresegner om teieplikt for helsepersonell?
- Kva seier pasient- og brukarrettslova om personvern?
- For kven gjeld teieplikta ifølgje helsepersonellova?
- Kva seier helse- og omsorgstenestelova om teieplikt for personell som ikkje yter helsehjelp?
- På kva måtar kan samtykkje til deling av helseopplysingar bli gitt?
- Kva opplysingar blir omfatta av teieplikta?
- Kva seier lovverket om opplysingar du får kjennskap til utanom arbeidstid?
- Kor lenge varer teieplikta?
- Kva er straffa for brot på teieplikta?
- I kva situasjonar har du som helsepersonell opplysingsplikt og meldeplikt?
Gå saman i grupper og lag eit rollespel eller ein film der de speler ein eller fleire av desse situasjonane:
- Du er på kjøpesenteret saman med vener og får auge på ein av brukarane frå praksisstaden din. Brukaren verkar litt flau over å treffe deg, men seier hei og du helsar tilbake. Ein av venene dine spør deg kven det er, og der du kjenner vedkomande frå. Kva svarer du?
- På bussen saman med fleire andre menneske sit to lærlingar frå praksisstaden din. Du overhøyrer at dei snakkar om jobben sin og brukarane der. Undervegs i samtalen deler dei informasjon om brukarane som du tenkjer at uvedkomande ikkje skal ha kjennskap til. Kva gjer du?
- På morgonmøtet i praksis får du rapport om ein ny brukar. Nokon av kollegaene dine kjenner denne brukaren frå den tidlegare arbeidsstaden sin og byrjar å fortelje intime detaljar om familieforholdet, økonomien og den tidlegare livsførselen til brukaren. Kva gjer du?