Utstyr:
teikneark og papp
farga papir, gjerne frå vekeblad og magasin
saks og lim
Del 1: Inspirasjon
Kollasj eller collage er ei uttrykksform som går ut på å setje saman bitar. La deg inspirere av korleis Matisse jobba med farga papir.
Du kan lære meir om Matisse og korleis han uttrykte seg gjennom kollasjar, ved å sjå ein engelsk video: Henri Matisse + The Cut Outs på Vimeo (2 minutt).
Del 2: Utforsking
Vel eitt eller fleire komposisjonsprinsipp du vil utforske nærare. Det kan til dømes vere:
symmetrisk balanse
asymmetrisk balanse
kontrast
rytme
Klipp ulike former i ulike fargar og sett dei saman slik at du får prøvd ut effekten av komposisjonsprinsippet du har valt.
Ta bilete av utprøvingane dine.
Del 3: Gjennomføring
Vel ei utprøving du vil jobbe vidare med.
Hald fram med å eksperimentere med korleis uttrykket endrar seg når du flyttar på og legg til nye bitar.
Når du har funne eit uttrykk du er fornøgd med, monterer du delane til eit bilete. Sett på passepartout, finn ein passande tittel og signer biletet ditt.
La klassen lage ei utstilling av dei ferdige bileta.
Del 4: Vurdering
Skriv ein kort presentasjon av kva komposisjonsprinsipp du har valt. Korleis har du brukt dette i utprøvingane og i den ferdige kollasjen din? Vurder det estetiske uttrykket i biletet ditt.
