Linjer i grafisk design
Typografi, fotografi og illustrasjonar inneheld ofte fleire linjer. Linjene kan delast inn etter funksjon: Konturlinjer blir brukte til å avgrense og markere innsida og utsida av eit objekt, skiljelinjer blir brukte til å markere avstand mellom objekt, og dekorlinjer blir brukte som pynt. Plasseringa av element i eit bilete skaper også usynlege linjer og retningar som påverkar det visuelle uttrykket.
Når du skal beskrive linjer, kan du bruke uttrykk som:
- tynn/skjør eller tjukk/sterk
- lang eller kort
- horisontal/vassrett, vertikal/loddrett eller diagonal/stigande/synkande
- rett, i sikksakk eller kurva/boga
- naturleg eller unaturleg
- heiltrukken eller open
Vertikale linjer blir oppfatta som sterke, mens horisontale linjer er harmoniske. Kurva linjer viser til rytme og bevegelse, glede og generøsitet. Dei blir oppfatta som meir feminine enn skarpe kantar. Skarpe og kraftige former blir oppfatta som livlege og unge, og vi ser dei gjerne som meir maskuline. Dei gir uttrykket energi og aggresjon.
