Kiwi
Smak og lagring
Kiwi er botanisk sett eit bær, og smaken – som er frisk og syrleg – kan minne mykje om stikkelsbær. Inga anna eksotisk frukt har erobra verda i den grad som kiwi har gjort, og det har mykje med den gode haldbarheita å gjere.
Kiwi har svært god haldbarheit når han er umoden. Då må han bli oppbevart kjølig, helst mellom 0 og 2 gradar, og vernast mot etylengass og lufttrekk. Moden kiwi har noko dårlegare haldbarheit, men kan tole lagring i fleire dagar ved låg temperatur.
Variantar
Det har etter kvart blitt fleire variantar på marknaden, og vi har i dag kiwi med både grønt og gult fruktkjøtt. Den grøne kiwien har eit brunt, hårete skal som mange kanskje ikkje tenker på å ete, men visste du at det faktisk er heilt greitt å ete kiwien med skalet på? Skalet tilfører ein ekstra tekstur og næringsstoff! Fruktkjøttet inneheld mange etande kjernar og blir hausta før det er heilt modent, for så å modnast under distribusjon.
Gul kiwi er ei vidareutvikling frå grøn kiwi, men med andre eigenskapar. Denne er òg henta frå Kina og vidareutvikla på New Zealand. Gul kiwi inneheld ikkje enzymet actinidin, og frukta er derfor mindre syrleg. Med sitt glatte, tynnare skal kan òg gul kiwi etast med skalet på, eller du kan skrelle han.
Smaken er tropisk søt og kan minne om ei blanding av mango, banan og melon. Fruktkjøttet er gult med små, etande, raudsvarte kjernar. Fasongen er litt avlang med ein liten knopp i enden. Han blir importert frå New Zealand i perioden frå juni til november.
Bruksområde
Kiwi blir eten naturell. Han kan bli delt i to og eten med skei som eit blautkokt egg, eller du kan ete han heil med skalet på. Kiwi kan brukast i fruktsalat, til ost og til steikte kjøttrettar. Kiwi blir òg brukt til å pynte kaker med. Grøn kiwi må ikkje brukast i gelé, sidan han gjer at geléen ikkje stivnar.
Næringsinnhald
Kiwi inneheld dobbel så mykje vitamin C som appelsin. Grøn kiwi inneheld òg eit proteinspaltande enzym, actinidin, som er bra for fordøyinga. Dette stoffet gir òg frukta den eigenskapen at kjøtt kan møyrnast om vi legg nokre skiver kiwi på det.
Sjå Matvaretabellen frå Mattilsynet for nærare opplysningar om næringsinnhaldet.
Kvalitetskrav
Kiwi skal vere heil, fast og fri for mørke flekkar. Skalet skal vere utan rynker eller skrukkar. Kiwi er moden når han gir etter for lett trykk.
Film om kiwi
I filmen under (lengde 2:26) kan du lære meir om kiwi og få tips til korleis han kan bli laga til og servert.