Paprika

Det finst mange ulike sortar paprika med varierande form, farge, storleik og smak. Alle typar paprika byrjar som grøne, og nokre blir verande grøne, mens andre skiftar farge til raud, gul, oransje, kvit eller mørk fiolett. Raud og gul paprika er altså mogen grøn paprika. Smaken er noko mildare hos dei mogne variantane enn hos grøn paprika. Prisen er ofte òg litt høgare sidan dei mogne variantane tek lengre tid å dyrke fram. Raud paprika er mest vanleg. Han finst heile året og har ein mild og fin smak. Grøn paprika er noko beiskare på smak enn til dømes gul og raud, men er ofte rimelegare i innkjøp. Gul paprika har dei same eigenskapane som raud paprika og er mild og god i smaken. Gul og grøn paprika finst òg heile året.

Paprika bør lagrast i plast ved 8 til 10 gradar. Han bør minst vare éi veke eller meir dersom temperaturen og luftfukta er rett.

Paprika blir vaska, og stilken, innvendige hinner og frø blir fjerna. Deretter kan han delast i to og strimlast eller kuttast i ringar. Paprika kan nyttast til mykje, men er god til ost, i salatar og i gryteretter, stuingar eller wok. Vi kan òg fylle paprikaer med kjøttdeig, hakka lauk og ris og steike dei i omn eller gratinere dei. Paprika inneheld mykje vitamin C, og han er best å ete rå om du skal få med deg alle vitamina. Han er god som garnityr på brødskiver.

Paprika er som andre typar capsicum og inneheld mykje vitamin A og C. Den raude inneheld tre gonger så mykje vitamin C som appelsin, og den grøne dobbelt så mykje. Paprika inneheld òg mineral og fiber. Paprika er kalorifattig, og næringsinnhaldet varierer noko frå raud til grøn paprika.

Sjå Matvaretabellen frå Mattilsynet for nærare opplysningar om næringsinnhaldet.

Paprika skal ha ein blank og pen utsjånad. Fruktkjøttet skal vere fast og fint med ein sterk farge. Han bør vere fri for misfarga flekker eller sprekkar. Skalet bør vere tjukt og saftig med sprø konsistens utan teikn til innskrumping eller slappheit.

I den korte filmen under kan du lære meir om paprika og få tips til korleis han kan bli laga til og servert.