Det ein har bruk for
Ein generell regel er at servitørane har ansvar for det dei har bruk for i arbeidet sitt. Døme på det er dette:
- bestikk
- gripebestikk
- glas
- tallerkenar
- undertallerkenar
Sjølve anretninga av maten er kokkane sitt ansvar, men det er viktig at kjøkkenet og matsalen samarbeider når det gjeld talet på tallerkenar, koppar og glas og kva type servise som skal brukast.
I tillegg til dette er servitøren si viktigaste oppgåve å vere til stades når det er gjestar i restauranten.
Oppvask
Dei fleste spisestadene har eige oppvaskpersonale, men det finst òg restaurantar der servitørane har ansvaret for oppvasken. Mange bedrifter har eigne oppvaskmaskiner for reingjering av glas. Restaurantane er pålagde å følge forskrift om næringsmiddelhygiene, eller hygieneforskrifta/IK-Mat, når det gjeld oppvask.
Glas, servise og bestikk
Servitørane har alltid ansvar for å sortere glas, servise og bestikk etter bedrifta sine faste rutinar. Hugs at utstyret må handsamast slik at det blir minst mogleg svinn og skadar. Utstyret bør ha faste plassar, slik at vi unngår å bruke unødvendig med tid på å leite etter utstyr.
Polering av utstyr
Alt dekketøy skal polerast. Dette blir gjort fordi vi må kontrollere at alt som blir brukt, er skinande blankt og reint. Såperestar, matrestar og munnmerke er uhygienisk. Før du startar å polere, er det viktig at hendene er reine. Polering gjer at du også kan organisere dekketøyet på reine brett med serviett, slik at oppdekkinga går raskt og effektivt.
Når du polerer, skal du alltid bruke eit handkle som ikkje loar, eller ein handserviett.
Ved dei fleste restaurantane blir alt dekketøy polert like etter at det er vaska, slik at alt av dekketøy, salt- og peparbørser og lysestakar er klare til bruk
Glas
Hald eit handklehjørne om stetten, og poler med resten av handkleet. Handkleet må vere tørt, men glasa kan gjerne haldast over vassdamp før du begynner å polere. Med god teknikk går det raskt å polere heile glaset. Dette er òg ein måte å polere vasar på.
Polering av bestikk
Til polering av bestikk er det lurt å fukte delar av ein bestikklut eller ein handserviett og polere med denne først, og til slutt polere med den tørre delen.
- Finn fram det du treng til poleringa: ein klut eller serviett som ikkje loar, varmt vatn og eit reint brett.
- Dypp etedelen av bestikket du skal polere, i varmt vatn.
- Poler deretter bestikket med kluten eller servietten. Pass på at heile bestikket blir polert, både etedelen og skaftet. Ta skaftet til slutt.
Tallerkenar og porselen
Alle tallerkenane og dessutan første og andre servise må polerast før bruk. Når lyset speler på ein tallerken, kan ein faktisk sjå spor av såperestar.
Salt- og peparbørser, tannpirkarar
Salt- og peparbørser og dessutan tannpirkarglas skal polerast før dei blir sette på bordet, samtidig som dei blir fylte opp.
Lysestakar
Når det skal dekkast med lysestakar, må dei vere frie for stearinflekkar. Du fjernar stearinflekkar ved å halde lysestaken under varmt rennande vatn. Då glir stearinen av lysestaken, og du kan polere han med eit tørt handkle. Lysestakar må haldast ved like jamleg. Bruk eit eige pussemiddel til dei ulike metalla for å friske dei opp.
Å legge på duk
Føremålet med duken er først og fremst å pynte bordet. Eit bord utan duk har lett for å gi eit nakent og kjølig inntrykk. Når duken skal leggast på bordet, bør det gjerast på ein sikker og elegant måte.
- Sørg for at bordet står støtt, og at det er vaska.
- Still deg ved langsida av bordet, og trekk stolane unna.
- Plasser duken på bordet med midtbretten og jaren mot deg og sidebretten frå deg.
- Brett duken ut i lengderetninga.
- Løft opp duken, og sving han over bordet.
- Midtbretten på duken skal ligge midt på bordet.
- Duken skal vere like lang heile vegen rundt.
- Skal det leggast på ekstra lange dukar, bør de vere to eller fleire som gjer det.
- I ein restaurant eller eit selskapslokale er det viktig at alle borda er duka likt, og at den delen som heng ned over bordkanten, er like lang på alle borda.
- Skal du duke eit rundt bord, er det viktig at hjørna på duken dekker bordbeina.
Hugselappen
- Ein av dei daglege oppgåvene til servitøren er å klargjere restauranten for bevertning.
- Alt av dekketøy, glas og bestikk skal polerast før bordet blir dekt.
- Det er viktig å hugse på at sjølv om det er oppgåver som må gjerast i ein matsal, er gjestane som er til stades, alltid viktigast.