Planlagd forelding?

Opne bilete i eit nytt vindauge

CC BY-NC

Bilete: Maskot

Forbrukarkjøpslova skal verne og gi rettar knytte til kjøp av varer og tenester til forbrukarar. Tenk deg at ein kunde har kjøpt ein ny mobiltelefon hos ein elektronikkforhandlar, og etter kort tid oppdagar hen at batteriet i telefonen begynner å svikte.

1. Kva er reklamasjonsfrist for mobiletelefonar?

2. Gjer greie for kva rettar kunden har. Korleis er det mogleg å gå fram for å reklamere når kunden oppdagar at batteriet i telefonen begynner å svikte kort tid etter at kjøpet blei gjort?

3. Diskuter med ein medelev:

• Kor lenge bør vi kunne forvente at ein mobiltelefon skal verke?

• Trur de at mobiltelefonar blir produserte ved at det bevisst blir bygd inn mekanismar og eigenskapar som gjer at dei får forkorta livsløp? Kva kan i så fall vere årsaker til det?

• Det går føre seg ei kontinuerleg designmessig og teknologisk utvikling. Kor lang tid meiner de det tek før ein mobiltelefon kan kjennast utdatert for forbrukarar?

• Har de sjølv hatt eit ønske om å byte ut ein eller fleire mobiltelefonar før dei har vore utslitne? Kvifor, i så fall?

Opne bilete i eit nytt vindauge

CC BY-NC

Bilete: Shutterstock, NTB

Fleire produkt blir produserte etter prinsippet "planlagd forelding", der produsenten bevisst forkortar levetida av produkt. Planlagd forelding" inneber å bevisst bygge inn svakheiter og bruke strategiar for utskifting av produkt tidlegare enn nødvendig, slik at dei blir erstatta av nye produkt.

Det blir sagt at lyspærene er blant dei første døma på planlagd forelding. Levetida til lyspærene blei forkorta på 1920–30-talet for å auke etterspørselen og få kontroll på lyspæremarknaden i verda. Dokumentarfilmen som er lenka til nedanfor, gir dykk meir innblikk i dette.

1. Drøft korleis problem som følge av planlagd forelding kan løysast i åra framover.

2. Drøft påstanden: "Alle produsentar bør slutte med å forkorte levetida til produkt igjennom planlagd forelding."