Setningsadverbial i heilsetningar

Opne bilete i eit nytt vindauge

CC BY-NC-SA

Bilete: Shutterstock, NTB

Sjå nærare på desse fagomgrepa før du les teksten:

Forteljande heilsetning

Forteljande heilsetning er dei vanlegaste setningane som ikkje er spørsmål eller leddsetningar. Vi bruker desse for å fortelje noko: "Anna et" og "Eg må sove".

Subjekt

Subjekt er setningsleddet som utfører ei handling i ei setning. I setninga "Muhammed drikk vatn" er "Muhammed" subjekt.

Verbal

Verbalet er det som skjer i setninga. Verbalet er alltid eit verb. I setninga "Muhammed drikk vatn" er "drikk" verbalet.

Dette er ein del av ein læringssti om setningsanalyse. For å komme til starten av læringsstien kan du gå til artikkelen "Kva er eit setningsadverbial?"

I forteljande heilsetningar står setningsadverbialet (SA) etter verbalet (V):

• I setninga "Ho et (V) berre (SA) ein bolle" er "et" verbalet og "berre" setningsadverbialet.

• I setninga "Vi kjem (V) sjølvsagt (SA) i bursdagen din" er "kjem" verbalet og "sjølvsagt" setningsadverbialet.

• I setninga "Eg dreg (V) ikkje (SA) no" er "dreg" verbalet og "ikkje" setningsadverbialet.

Visuell forklaring

"Visuell" betyr å gjere noko synleg. Ofte kan det hjelpe å bruke fargar/mønster for å hugse plassering av setningsledd. Vi kan derfor forklare plasseringa av setningsledda slik:

Opne bilete i eit nytt vindauge

CC BY-SA

Bilete: Åsa Abusland

Nokre setningsadverbial kan stå først i setninga. Det gjer vi når vi ønsker å legge vekt på innhaldet i setningsadverbialet. I desse døma er det første ordet i kvar setning setningsadverbialet:

• Dessverre drog ho i dag.

• Alltid skal du vere sur!

• Sjølvsagt kjem vi!

Når setningsadverbialet står først, pleier vi å legge trykk på ordet når vi snakkar.

Når setninga har to verb, eit hjelpeverb og eit hovudverb, skal setningsadverbialet alltid stå etter det første verbet (hjelpeverbet):

• I setninga "Eg kan (V) sjølvsagt (SA) komme" er "sjølvsagt" setningsadverbial og står etter hjelpeverbet "kan".

• I setninga "Eg kan (V) ikkje (SA) dra no" er "ikkje" setningsadverbial og står etter hjelpeverbet "kan".

Opne bilete i eit nytt vindauge

CC BY-SA

Bilete: Åsa Abusland

Gå vidare i læringsstien for å gjere nokre øvingar der du skal setje setningsadverbialet på rett plass i heilsetningar.