Diskuter i klassen
Ifølgje FN er tekstilindustrien verdas nest mest forureinande industri, etter oljeindustrien. Diskuter korleis vi kan påverke kledeproduksjon til å bli meir berekraftig.
Del 1: Undersøk eigen garderobe
Kartlegg kva materiale dine eigne klede er laga av. Tenk over om dette er medvitne val, eller om det er tilfeldig. Kva påverkar deg når du vel klede?
Del 2: Lag eit nytt plagg av klede du har frå før
Finn du klede du ikkje bruker? Kan desse få eit nytt design? La deg inspirere av Jenny Skavlan og elevar frå Edvard Munch videregående skole. Kan du òg skape eit nytt plagg av noko du har frå før?
Idéutvikling og eksperimentering
- Ta bilete av plagget du vil redesigne, slik at du kan vise korleis det såg ut før du starta redesign-prosessen. Bestem om du vil lage klede til deg sjølv eller til nokon andre.
- Lag raske idéskisser til korleis du kan endre plagget til å passe deg (eller nokon andre) i form og uttrykk.
- Bruk gjerne nåler til å prøve ut korleis du kan lage innsnitt eller leggje opp plagget. Viss du har tilgang til ei byste, kan du forme plagget på ho.
- Finn materiale du vil supplere med.
- Prøv ut ulike teknikkar du kan bruke til å oppgradere plagget ditt.
Planlegging og gjennomføring
Planlegg det ferdige plagget, set deg inn i det saumtekniske og saum plagget.
Presentasjon
Ta bilete av det ferdige produktet. Plasser plagget og modellen inn i omgivnader som passar til uttrykket på kleda.
Bli samde i klassen om de vil lage ei utstilling som viser plagga før og etter redesign, eller om de vil arrangere ein catwalk.
Innlevering
- foto av plagget før og etter redesign
- idéskisser og utprøvingar
- eigenvurdering av det ferdige produktet og arbeidsprosessen din
Artistar med redesign på grøn løpar
Sjå korleis kjendisane reagerte på redesignet til Jenny Skavlan og elevane frå Edvard Munch videregående, og korleis dei "grøne antrekka" slo an på P3Gull .
Relatert innhald
Nettside hos youtube.com
Kjelder
Dory, K. (2018, 20. juni). Why fast fashion needs to slow down. Henta 22. september 2020 frå https://www.unenvironment.org/news-and-stories/blogpost/why-fast-fashion-needs-slow-down