Dyrkingsforhold

Skal du dyrke agurk heile året, må du installere mykje lys i veksthuset. Det er knapt nokon produksjon som er meir lyskrevjande. I dei seinare åra har fleire produsentar montert lamper med LED-lys. LED står for light emitting diode. Desse lampene forbruker mindre energi, noko som betyr at straumrekninga blir lågare.

Ein annan fordel er at dei ikkje gir varme. Derfor kan lampene bli plasserte tett inntil plantene og dermed gi mykje lys. Tradisjonelle lamper gir mykje varme, så ein fordel med desse er at dei bidreg i oppvarminga av veksthuset, men ulempa er at dei kan gi sviskadar på plantene om dei heng for nære.

Mange profesjonelle dyrkarar har i dag ei blanding av LED-lamper og dei tradisjonelle lampene. Begge typane har ein lyskvalitet som er eigna for plantedyrking.

Lysnivå

Krav til lys avheng av om du berre dyrkar i sommarhalvåret eller om du har heilårsdyrking. På sommaren er det mykje meir naturleg lys, og det er mindre behov for tilleggslys. Tilrådingane nedanfor er først og fremst for profesjonelle dyrkarar. Dei som vil dyrke fram agurkar til eige bruk i eit lite veksthus i hagen, treng ikkje så mykje lys.

Daglengde

Agurkplantene må få litt kvile i løpet av døgnet, og tilrådd daglengde er 18 timar. I kvileperioden på 6 timar blir alt tilleggslys sløkt i den mørkaste tida på døgnet.

Temperaturen i ein agurkproduksjon bør i løpet av eit døgn ligge mellom 20 og 24 gradar i gjennomsnitt. Det betyr at du må ta omsyn til daglengda når du stiller inn temperaturen.

Viss du til dømes har ein dagtemperatur på 22 gradar og nattemperatur på 18 gradar, og dagen er 18 timar, får du ein gjennomsnittstemperatur på 21 gradar:

Dagtemperatur på 22 gradar i 18 timar: $$ 22·18=396$$
Nattemperatur på 18 gradar i 6 timar: $$ 18·6=108$$
Sum: $$ 396+108=504$$
Gjennomsnittstemperatur: $$ \frac{\mathrm{sum}}{\mathrm{antal}}=\frac{504}{24}=21$$

Har du mykje lys, kan du gjerne ligge i det øvre sjiktet av den tilrådde gjennomsnittstemperaturen, altså 24 gradar. Med mindre lys er 20–21 gradar tilrådd.

Ei blanding av vatn og gjødsel blir tilført ved dryppvatningsslangar. Det er utvikla gjødseltypar som er samansette med rett mengde av alle næringsstoffa som plantene treng.

Kor mykje gjødsel plantene treng, avheng sjølvsagt av kva stadium dei er på. Små planter treng mindre næring enn store planter som produserer mykje agurk. Behovet for vatn aukar òg med storleiken på plantene. Det betyr at tilførselen av blandinga av gjødsel og vatn må aukast etter kvart som plantene veks.

Men vi må òg stundom justere dette når plantene er store og i full produksjon. Spesielt på sommaren vil periodar med høg temperatur og mykje sol gi høg fordamping. Behovet til plantene for vatn vil då auke meir enn behovet for næring. Då må vi justere ned leietalet i gjødselblandinga. Det er viktig å følge godt med på næringsstatusen i vekstmediet og om plantene viser teikn til næringsmangel eller dårleg vekst.

Det blir ikkje tilført CO₂ på natt når lysa er sløkte. Det er fordi plantene ikkje har fotosyntese i mørket, og CO₂ blir som kjent tilført for å gi ein meir effektiv fotosyntese. Det blir heller ikkje tilført når lukene på veksthuset er opne fordi gassen då berre vil forsvinne ut gjennom lukene. Det betyr at på varme sommardagar er det vanskeleg å halde det ønskte CO₂-nivået.

Rekn ut gjennomsnittstemperaturen i døgnet i dei tre alternativa. Diskuter om alle tre er like aktuelle å bruke når du dyrkar agurk.

1. Daglengde 18 timar. Temperatur 22 gradar på dag og 21 gradar på natt.

2. Daglengde 18 timar. Temperatur 20 gradar på dag og 16 gradar på natt.

3. Daglengde 18 timar. Temperatur 24 gradar på dag og 22 gradar på natt.