Avvik
Det kan vere feil som oppstår i rutinar, utstyr eller produkt, og som kan vere viktig for mattryggleiken. Til dømes kan temperaturen ha blitt for høg på kjølerommet eller skadedyr ha komme seg inn på kjøkkenet. Det er viktig at de oppdagar avvik, utbetrar dei og hindrar at det skjer igjen.
Det er eit krav om at alle matbedrifter skal ha ein skriftleg rutine for avviksbehandling. Dette er viktig for å bidra til trygg mat, og ein bør derfor registrere avvik på ein god og systematisk måte. Det er vanleg å bruke eit eige skjema eller ei loggbok.
Når noko går gale, må du ordne opp straks, og du må vurdere tiltak for å hindre at det skjer igjen. På avviksskjemaet eller i loggboka noterer du
- kva som gjekk gale
- kvifor det gjekk gale
- kva som vart gjort med det same
- kva som eventuelt må gjerast i ettertid
Døme på utfylt avviksskjema
Dato | Skildring |
|---|---|
5.11.20xx | Avviket blir vurdert som: (set kryss) Mindre: |
5.11.20xx | Kven oppdaga feilen: Nils |
5.11.20xx | Beskriv feilen/det som gjekk gale: Det var ei mus på kjøkkenet då eg kom på jobb i dag kl. 8. |
5.11.20xx | Avviksbehandling/kva gjorde du med ein gong: Tore og eg sette opp ei musefelle med ein gong. Det tok omtrent 7 minutt, og så hadde vi fanga musa. Vaska og desinfiserte benkar, moppa golvet og støvsugde under kombidamparen der vi hadde sett at ho var. Laga ikkje mat før det var gjort. Vi sette òg opp fleire feller for å sjå om det kan vere fleire mus. |
6.11.20xx | Korrigerende tiltak/kva blir gjort for å hindre at same feil skjer fleire gonger: Tek forholdet opp på personalmøtet om ei veke for å betre rutinane for å halde utgangsdøra lukka mest mogleg. Kontaktar skadedyrfirma og gjer ein avtale om jamlege skadedyrkontrollar. Vaktmeisteren kom og utbetra glipe under dør. |
12.11.20xx | Korrigerande tiltak er gjennomførte: |
I dette dømet på eit avviksskjema er det ei grundig beskriving av feilen, kva som vart gjort for å rette opp feilen, og kva slags korrigerande tiltak som vart utførte for å hindre at det same skjer fleire gonger. Feilen i dette dømet er at det vart oppdaga ei mus på kjøkkenet.