Tekstsamandrag av filmen
I starten blir det vist bilete og animasjonar av ulike råvarer som fisk og grønsaker. På startplakaten står det "Koke- og stekemetoder". Ein person er på restaurant og får servert ein heil, ubehandla fisk med to rå poteter, ei heil, rå gulrot og to bukettar rå brokkoli til.
Filmen viser oss gjennomgåande klipp frå eit storkjøkken der råvarer blir kokte og steikte i tråd med det forteljarstemma beskriv. Han viser òg ei ny scene frå restauranten der tre gjestar angir kor gjennomsteikt kjøttet dei har bestilt, skal vere.
Kokkelærlingen Mats fortel om kor stor variasjon det kan vere i tillaging av mat, og han bruker steiking av indrefilet og trekking av høgrygg som døme.
Juliane, elev på restaurant- og matfag, fortel om posjering av til dømes pølser. Seinare i filmen forklarer ho òg korleis ein blansjerer grønsaker.
Jonathan, elev på restaurant- og matfag, fortel om damping av til dømes laks, og han viser korleis ein på eit storkjøkken kan nytte kombiskap til dette. Seinare i filmen beskriv han korleis dei gjer klar grønsaker på førehand viss dei skal lage mat til store selskap. Jonathan forklarer òg om pannesteiking, bruning og omnssteiking, og om kor viktig det er at kjøttet får kviletid etter steiking.
Filmen blir avslutta med at dei tre gjestane på restauranten blir serverte kjøttrettane dei har bestilt.
Sluttplakaten viser kven som har bidrege til filmen: Rune Johnsen, Hæge Nore, Dag Fjæstad, Camilla H. Leirvik, Anita Hoel. Statholdergaarden, Ultra på Bryn, Tine, Kolonihagen, LOOP og Mattilsynet blir takka. Filmen er laga med midlar frå Utdanningsdirektoratet.
Spørsmål
- Forklar forskjellen på å koke og posjere fiskefiletar. Gi døme på råvarer som bør posjerast.
- Kvifor er det sunnare å ete dampa grønsaker enn grønsaker kokte i vatn?
- Forklar kva som skjer med råvara i bruningsprosessen.
- Kjøtt skal kvile. Kvifor?
- Kjenner du til andre koke- og steikemetodar enn dei du ser i filmen? Gir desse metodane andre resultat?
Praktiske oppgåver
- Vel ei grønsak, til dømes asparges eller brokkoli, som du lagar med og utan blansjering. Jamfør deretter smak, konsistens og utsjånad til dei blansjerte og ikkje-blansjerte grønsakene. Beskriv forskjellen med bilete og tekst.
- Steik eit kjøttstykke utan bruning og eit tilsvarande med bruning i omnen. Veg kjøttstykka før og etter steiking. Kva for eit kjøttstykke veg mest? Kvifor veg dette kjøttstykket mest?