Sukkerbrød
For å få eit luftig og høgt sukkerbrød er det viktig å ha ein luftig eggedosis og ta vare på lufta ved å vende inn mjøl forsiktig. Ved å tilsetje bakepulver oppnår du eit luftigare og høgare sukkerbrød.
Det er viktig med ein forvarma omn og at du ikkje opnar omnsdøra før sukkerbrødet er ferdigsteikt. Elles kan du risikere at sukkerbrødet fell saman. Snu gjerne sukkerbrødet opp ned på eit bakepapir ved avkjøling før du tek det ut av forma. For å lykkast er det viktig å vere nøye i alle delane av prosessen.
Oppgåve 1. Lag sukkerbrød
Lag to sukkerbrød, eit utan bakepulver og eit med bakepulver.
Sukkerbrød utan bakepulver
Forvarm omnen til 170 gradar.
Pisk 3 egg og 90 g sukker til luftig eggedosis.
Vend inn 90 g sikta kveitemjøl.
Ha massen over i ei springform på 20 cm, og steik i 30 minutt. Avkjøl og ta sukkerbrødet ut av forma.
Sukkerbrød med bakepulver
Forvarm omnen til 170 gradar.
Pisk 3 egg og 90 g sukker til luftig eggedosis.
Vend inn 90 g sikta kveitemjøl og ½ teskei bakepulver.
Ha massen over i ei springform på 20 cm, og steik i 30 minutt. Avkjøl og ta sukkerbrødet ut av forma.
Oppgåve 2. Undersøk sukkerbrøda
Samanlikn høgda på dei to sukkerbrøda. Er dei like høge?
Når begge sukkerbrøda er avkjølte, kan du dele dei i to. Er begge like luftige?
Var det store forskjellar mellom dei to sukkerbrøda? Kvifor? Kvifor ikkje? Kan noko anna enn tilsett bakepulver vere årsak til eventuelle forskjellar?