Vanleg kvitlauk

Kvitlauken er sett saman av fleire små laukar i eit tørt skal, som anten er heilt kvitt, kvitt med fiolette striper eller heilt raudfiolett. Dei små laukane er forma som appelsinbåtar og blir kalla fedd eller kløfter. Fruktkjøttet er heilt kvitt, det er saftig og har sterk smak og lukt.

Kvitlauken blir – som kepalauk –hausta etter at planten har blomstra og graset visna, dersom han skal tørkast. Kvitlauk blir òg hausta før graset visnar, og då blir han seld som fersk kvitlauk.

Kvitlauken bør bli oppbevart ved mellom 0 og 2 gradar. Ved låg temperatur og rett luftfukt kan tørka kvitlauk lagrast i fleire månader. Kjem temperaturen høgare enn 5 til 8 gradar, tek kvitlauken til å spire.

Kvitlauk blir skrella og reinska før bruk. Han blir nytta til å setje smak på mange ulike rettar, som kjøtt, pasta, pizza, supper og sausar, og til kvitlaukssmør, kvitlauksmajones og så vidare. Kvitlauk er ein av dei eldste kjende medisinplantane og blir mykje nytta i helsekost.

Kvitlauk inneheld vitamin B og C og fleire mineral, som jern, fosfor, kalsium og magnesium. Dei eteriske oljene som kvitlauken inneheld, er hevda å ha god medisinsk effekt på ei lang rekke område.

Sjå Matvaretabellen frå Mattilsynet for nærare opplysningar om næringsinnhaldet.

Kvitlauk skal vere tørr, heil og rein. Lauken skal vere saftspent og ikkje spire. Ytterskalet skal vere heilt og henge fast. Det skal ikkje vere mugg eller ròte. Storleiken på laukane skal vere jamn.

I den korte filmen under kan du lære meir om kvitlauk og få tips om hvordan han kan bli laga til og servert.