Service som konkurransemiddel
Ein cappuccino kan smake nokså likt i dei fleste kaffibarar, men heilskapsopplevinga kan avgjere kvar du vel å drikke cappuccinoen din. Koppen du drikk av, køen du står i, ventetida, stemninga, baristaen, humøret til dei tilsette, borda og stolane på kaféen kan vere med på å avgjere opplevinga.
Når konkurransen i marknaden er hard, kan service vere det konkurransemiddelet som er mest effektivt. Den servicen som personalet i ei bedrift yter overfor kundane, er vanskeleg for andre bedrifter å kopiere. God service vil derfor vere eit svært viktig konkurransefortrinn i kampen om kundane.
God service kan skape meirsal og gjensal
God service kan skape meirsal. Med meirsal meiner vi at kunden kjøper noko i tillegg til det dei opphavleg hadde planlagt. På ein restaurant kan du oppnå meirsal ved at gjesten bestiller både drikke og dessert sjølv om han eller ho eigentleg berre skulle ha ein rask middag.
I ferskvareavdelinga kan meirsal handle om at kunden kjøper både grønsaker og tilbehøyr i tillegg til lammesteika. Skal du lykkast med dette, må du avdekkje behova til kunden og ha kunnskap om kva som passar saman.
Gjensal er at kundane kjem tilbake og kjøper meir ein annan gong. Det er enklare å halde på eksisterande kundar enn å skaffe nye. Kundar som får dekt behova sine, og som opplever at det er lett, trygt og triveleg å handle hos oss, vil kome tilbake og òg tilrå oss til andre.
God service skaper fornøgde kundar og godt omdømme
Servicen du yter til kundane, er viktig for omdømmet til bedrifta og kan vere avgjerande for om kunden ønskjer å kome tilbake til bedrifta di.
Viss kunden får tilfredsstilt forventningane og behova sine, vil han eller ho gjerne tilrå bedrifta til andre, og positiv omtale er verd meir enn all annan reklame.
I motsett fall vil ein misfornøgd kunde lett fortelje både vener og kjende om opplevinga si, og kanskje òg spreie dårleg omdømme på sosiale medium.