Oppgåve 1
Nokre føretrekkjer durumkveite når dei lagar fersk pasta, andre føretrekkjer kveitemjøl eller ei blanding. I denne oppgåva skal du lage ein pastadeig med kvar av mjøltypane og undersøkje om det blir nokre skilnader.
Lag ein porsjon pastadeig ved å berre nytte vanleg kveitemjøl.
Lag ein porsjon pastadeig ved å berre nytte mjøl av durumkveite.
Ta utgangspunkt i denne grunnoppskrifta på pastadeig:
250 g kveitemjøl
0,5 ts salt
2 egg
3 eggeplommer
Ha alle ingrediensane i ein foodprosessor og køyr saman. Då får du ein smulete deig. Hell ut deigen på benken og kna han saman med hendene. Etter at deigen er blanda, pakkar du han inn i plast og legg han til kviling cirka 30 minutt på kjøl før du kjevlar han ut på pastamaskina.
Vart det nokon skilnad på desse deigane? Tenk på tekstur og utsjånad.
Oppgåve 2
Pasta carbonara og pasta bolognese er to tradisjonelle pastarettar frå Italia. Vel deg ein av desse rettane du har lyst til å lage, og finn oppskrift. Lag sausen.
Oppgåve 3
Bruk ei pastamaskin til å lage tagliatelle av begge dei to deigane dine.
Samanlikn dei to ulike deigane når dei er ferdig kokte. Er det nokon skilnad på pasta laga med durumkveite og pasta laga med vanleg kveite? I så fall, kva er skilnadene? Tenk på til dømes konsistens og smak.
Server den kokte pastaen med sausen du har laga.