Dei ulike rettane
Kaldtbord er ein buffé som består av ulike typar rettar. Det er hovudsakleg kalde rettar, men ein kan òg ha varmrettar på eit kaldtbord. I tillegg er det vanleg å servere dessert. Kaldtbord kan nyttast til dei fleste høve, anten det er ein konfirmasjon, eit bryllaup eller ein dåp. Kaldtbordet inneheld mange av dei same rettane som ein kan finne på eit lunsjbord. Gjestane har eit godt utval og kan forsyne seg med det dei likar best. Mange av rettane på eit kaldtbord kan ein lage til god tid i førevegen.
Rettar ein vanlegvis finn på eit kaldtbord:
- heilkokt laks eller aure med peparrotkrem
- graven eller røykt fisk med eggerøre
- assortert spekemat med eggerøre, rømme og potetsalat
- roastbiff med remulade
- kabaret av skaldyr og grønsaker
- skinkesteik med raudkål
- assortert ostefat med nøtter og honning
- karbonadar med steikt lauk, servert kalde eller varme
- kyllinglår, servert kalde eller varme
Tilbehøyr
brød: gjerne fleire typar brød – smaksette, grove og fine, glutenfrie – flatbrød og kjeks
smør: ulike typar smør eller margarin, og gjerne lettmargarin for dei som ønsker dette
sausar: majones, aioli, rømmesausar og cocktaildressing
salatar: grøn salat, pastasalat og waldorfsalat
Dessertar
frukt som er posjert eller skoren i skiver, eller fruktsalat
puddingar, geléar og fromasjar med passande dessertsausar
kremar, isdessertar og kaker
Mengdeberekning
Kor mykje mat ein skal rekne, er avhengig av kor stort kaldtbordet er, og mengda kjøtt og fisk avheng av tilbehøyret. Rekn om lag 500–600 g mat per person, inkludert tilbehøyr.
Drikke
Øl og akevitt er vanleg. Skal det serverast vin, kan det vere ein rosévin eller ein tørr eller halvtørr kvitvin.
Alkoholfritt
Isvatn, mineralvatn, kaffi og te.
