Teikn på framandlekam i halsen
- Akutte pustevanskar og hoste.
- Panikkjensle, personen tek seg gjerne til halsen.
- Ved fullstendig tilstopping vil personen først bli raud i ansiktet, deretter blå og gispe etter luft.
- Personen klarer verken å snakke eller hoste.
Førstehjelpstiltak ved framandlekam i luftvegane
Ring 113, her vil du få rettleiing og hjelp.
Person med pustevanskar som klarer å snakke og hoste:
Oppmod personen til å hoste. Dette er mest effektivt.
Person som ikkje klarer å snakke eller hoste fordi luftvegane er blokkerte:
Barn over eitt år og vaksne:
- Stå bak personen og hald rundt vedkommande.
- Bøy hovudet til personen framover.
- Veksle mellom å gi 5 kraftige slag midt mellom skulderblada på ryggen følgt av 5 kraftige støyt øvst i magen (Heimlichs manøver).
Barn under eitt år:
- Legg barnet langs låret ditt og hald hovudet lågt. Hald ei hand under brystet på barnet og ei hand på ryggen til barnet. Dette gjer det enklare å snu barnet.
- Veksle mellom 5 slag midt mellom skulderblada og 5 brystkompresjonar.
Person som er eller blir medvitslaus:
Start hjarte- og lungeredning med 30 kompresjonar følgde av 2 innblåsingar (30:2). Sjå raskt etter framandlekamen i munnen før kvar innblåsing.
Vær alltid forsiktig når du skal prøve å fjerne framandlekamen frå munnhòla. Det er lett å skyve framandlekamen lenger ned.
Følg instruksjonane for hjarte- og lungeredning.
Viss du er åleine – Heimlichs manøver gjennomført på deg sjølv:
- Knyt hendene like over navlen.
- Gi deg sjølv kraftige støyt oppover magen.
- Len deg eventuelt over ein stolrygg for å oppnå det same.
Kjelder
Fremmedlegeme i luftveiene. (2019). I T. Johannessen (red.), Norsk Helseinformatikk. Henta 6. januar 2020 frå https://nhi.no/forstehjelp/luftveier/fremmedlegeme-i-luftveiene/
Fremmedlegeme i luftveiene – generelt. (2018). I I. Johansen og J. Blinkenberg (red.), Legevakthåndboken (6. utgåve). Henta 6. januar 2020 frå https://www.lvh.no/naar_det_haster/fremmedlegeme_i_luftveiene/fremmedlegeme_i_luftveiene/generelt
Helsedirektoratet (2016). Førstehjelp hvis noe sitter fast i halsen, nesen eller øret. Henta 31. mai 2020 frå https://helsenorge.no/forstehjelp-og-skader/fremmedlegeme-i-neser-og-luftveier