Anabole steroid

Begrensa bruk

Bilete: Shutterstock, NTB

Anabole-androgene steroid er kunstig framstilte kjønnshormon som har den same effekten i kroppen som det mannlege kjønnshormonet testosteron. Anabol betyr "oppbyggande effekt", og androgen er ei fellesnemning på mannlege kjønnshormon. Testosteron er det viktigaste kjønnshormonet hos menn. Østrogen og progesteron er dei kvinnelege kjønnshormona. Både menn og kvinner produserer både mannlege og kvinnelege kjønnshormon. Menn produserer meir testosteron og mindre østrogen, kvinner produserer meir østrogen og mindre testosteron.

Testosteron – både androgen og anabol effekt

Når gutar kjem i puberteten, produserer kroppen meir testosteron. Dette fører til skjegg, kroppshår og stemmeskifte i tillegg til vekst og utvikling av kjønnsorgan. Dette er den androgene effekten av testosteronet. I tillegg har testosteron ein anabol effekt som gjer at musklane veks raskare.

Dei som startar med AAS, er spesielt ute etter den anabole effekten fordi han bidreg til auka muskelvekst ved trening. Den androgene effekten av testosteronet er likevel ikkje til å unngå.

Opne bilete i eit nytt vindauge

CC BY-NC-SA

Bilete: Thomas Raupach

Produksjonen av legemiddel er svært strengt kontrollert og skjer i lukka, hygieniske laboratorium av personar med farmasiutdanning. Pasientsikkerheit er sentralt. Til samanlikning skjer ikkje produksjonen av AAS og andre dopingpreparat på same måte.

Det er avdekt ved fleire høve at falske dopingpreparat har vorte produserte i Noreg med importert råstoff og utstyr. Desse preparata har vorte produserte under uhygieniske forhold, gjerne i garasjar eller kjellarar av personar utan farmasiutdanning. Her er ikkje pasientsikkerheita vesentleg; i staden er det viktigast å tene mest mogleg pengar på produksjonen. Resultatet blir "ureine" produkt med stor infeksjonsfare ved bruk.

Opne bilete i eit nytt vindauge

CC BY-SA

Bilete: Antidoping Norge

Det er vanskeleg å svare på korleis kvar og ein vil reagere på AAS fordi vi er ulike individ med ulikt genmateriale. Når du startar, kor gammal du er når du startar, mengda du tek, og kva slags preparat du tek, er noko av det som påverkar korleis du vil reagere. Likevel er genane dine avgjerande, og det kan ein ikkje føreseie. I tillegg er det viktig å hugse på at dette ikkje er eit preparat frå apoteket, men kanskje noko som er blanda i ein kjellar, og ingen har sikra at preparatet faktisk inneheld det som står på pakken. Biverknadene opptrer ulikt frå individ til individ, og på ulike tidspunkt.

Til samanlikning vil ein lege som skriv ut ein resept på eit legemiddel, ta utgangspunkt i helsetilstanden din når hen vel kva legemiddel og kva dosering du skal ha. Her speler alderen din, vekta di og sjukdomshistoria di inn, og hen vil òg ta omsyn til om du eventuelt tek andre medisinar. Legen vil òg følge deg opp for å sjå korleis du reagerer på medisinen du har fått. Den same individuelle tilpassinga og oppfølginga får du ikkje når du bruker AAS.

Det er gjerne menneske som har opplevd vanskelege ting i livet som startar med doping. Dette kan komme av psykiske utfordringar av som til dømes mobbing, omsorgssvikt, dødsfall, sjukdom eller andre ting som vedkommande opplever som ei krise i livet. Nedsetjande kommentarar frå andre om eigen kropp er òg noko som kan føre til tankar om å endre på kroppen og å ta i bruk doping for å nå desse måla.

Målet med dopingbruken er mellom anna å bli sett, få stadfestingar, ta igjen, verne seg eller å dekke over vonde kjensler.

Risikofaktorar som kan føre til dopingbruk:

• misnøye med kroppen og låg sjølvkjensle

• eit ønske om auka muskelmasse

• ei oppfatning av at andre bruker doping, og at det er høg aksept for å dope seg i samfunnet

• overdriven bruk av kosttilskot

• livskriser

Rundt to–tre prosent av norske ungdommar og unge vaksne brukar doping i dag.

Det er absolutt mogleg å få framgang i treninga utan å bruke doping, og kroppen har flest fordelar ved å trene utan doping. Det beste for å få treningsframgang er å ha kunnskap om trening, kosthald og restitusjon. Det lønner seg òg å ha gode rollemodellar. Du kan lese meir om trening og kosthald i lenkene under. Du kan òg spørje kroppsøvingslæraren din.

Ressursar om trening

• Fagartikkel: Treningsprinsipp

• Fagartikkel: Korleis trene styrke?

• Rettleiing: Musklar, muskelbruk og øvingar

Ressursar om kosthald

• Oppgåve: Utforsk ditt eige kosthald

• Oppgåve: Podkast om kosthald og ernæring

Under finn du ein podkast frå Antidoping Norge.

Joachim brukte anabole steroider i over åtte år

Har du nokon gong snakka med ein person som har brukt anabole steroid? Joachim frå Oslo starta i slutten av tenåra då ein kompis på det lokale treningssenteret spurde om han var interessert i å få ras...Vis meir

Tekstversjon

1x

0:00

-0:00

CC BY-SA

Podkast: Antidoping Norge

CC BY-SA

Bilete: Antidoping Norge