Væskebalansen
Mellom 50 og 75 prosent av kroppen vår består av vatn. Kroppen mistar væske via urin, avføring, hud og lunger. Vi kan ikkje lagre vatn, og kroppen må derfor ha dagleg tilførsel av vatn for å erstatte væsketap.
Vi nyttar uttrykket væskebehov, sidan vatn finst i ulike matvarer og drikkar. Utan vatn kan vi ikkje ta opp næringsstoffa frå maten, og vatn inngår i svært mange av funksjonane i kroppen, til dømes transport, fordøying og temperaturregulering.
Væskebehovet varierer med fysisk aktivitet, klima, kroppsstorleik og helsetilstand. Ved store væsketap som ved diaré, oppkast og sterk sveitte aukar væskebehovet.
Væskebehovet blir først og fremst dekt gjennom mat og drikke, og maten bidreg med om lag halvparten av væsketilførselen.
Tommelfingerregel:
Under normale omstende treng vi 30 ml per kilo kroppsvekt per døgn for å dekkje det gjennomsnittlege væskebehovet og halde væskebalansen ved lag. Til dømes treng ein mann på 75 kilo minimum 2250 ml i døgnet.
Vatn som tørstedrikk
I kostråda blir det tilrådd at vi vel vatn som tørstedrikk. Vanleg vatn dekkjer væskebehovet utan å bidra med unødvendige kaloriar og er derfor den aller beste drikken når du er tørst.
Kjelde
Helsedirektoratet. (2012). Kosthandboka – rettleier i ernæringsarbeid i helse- og omsorgstenesta. https://www.helsedirektoratet.no/veiledere/kosthandboken/