Hopp til innhald
Arbeidsoppdrag

Lag nettside om kortreiste turar

Mange drøymer om turar langt heimanfrå, men vi gløymer ofte at det òg finst interessante destinasjonar og turmål rett utanfor vår eiga stovedør. Det lokale turistlaget har gitt deg i oppdrag å planleggje og produsere ei nettside som hjelper folk med å finne dei lokale turmåla sine.
To unge personar ligg i eit telt i ei stove. Foto.
Bilete: Filmkonsulentene / CC BY-NC-SA 4.0

Du skal gjere undersøkingar, planleggje og setje opp ei nettside for det lokale turistlaget med mål om å få fleire ut på kortreiste turar. Nettsida skal setjast opp i ei publiseringsplattform som Wordpress eller Drupal.

Bilete og videoklipp som du bruker, må overhalde åndsverkslova. Kanskje må du sjølv ut for å ta bilete viss du ikkje kan finne alternativ under Creative Commons eller andre opne lisensar.

Krav til arbeidsoppdrag

  1. Skriv kort ei skildring av oppdraget du har fått.

    Viss du opplever at oppdraget er uklart, bør du snakke med læraren din før du går vidare.

  2. Nettsider kjem i nokre typiske variantar (layout og innhald). Kom med døme og vel ein du tenkjer er aktuell for dette oppdraget.

  3. Vil nettsidevarianten du vel, krevje jamlege nye postingar av innhald, eller kan innhaldet stå statisk på sida over lengre tid utan at sida blir opplevd som utdatert?

Om nettsidevariantar

Nettsider kan ha veldig ulik utforming, men i praksis går nokre vanlege variantar igjen, avhengig av kva som er formålet med nettsida, og kven som er målgruppa;

  • bloggside

  • nettavis

  • nettbutikk

  • offentleg nettside

  • sosialt medium

  • porteføljeside (portfolio)

Når vi surfar, kjenner vi igjen webside-variantane vi besøkjer, og forventningane våre til innhald og funksjonalitet blir justerte avhengig av varianten. Dette er viktig å ta med i vurderinga når du skal bestemme deg for ein variant. Vil varianten dekkje behovet, og kor mykje arbeid vil det vere å dekkje forventingane vi har til nettsida?

Eit døme på dette kan vere nettaviser; vi forventar at dei blir oppdaterte kvar dag eller fleire gonger om dagen. Ei porteføljeside for ein forfattar kan derimot stå uendra i månader utan at sida nødvendigvis blir opplevd som utdatert.

  1. Bestem deg for kva publiseringsplattform (CMS) du ønskjer å bruke.

  2. Lag design for nettsida og implementer denne. Bruk gjerne dummy-tekst og bilete i utviklingsfasen. Dokument godt undervegs så det er lett å sjå progresjonen din.

  3. Når du er fornøgd med designet, fjernar du dummy-innhald og legg inn endeleg innhald.

  4. Vurder prosess og produkt i eit refleksjonsnotat som du gir til læraren din.

CC BY-SA 4.0Skrive av Tron Bårdgård.
Sist fagleg oppdatert 12.05.2022