Helsesektoren

Staten har eit overordna ansvar for helsepolitikken i landet og skal sikre at alle har lik tilgang til helsetenester. Statens helsetilsyn har ansvar for å føre tilsyn og kontroll med helsetenestene. Stortinget og regjeringa gjer vedtak om lover og forskrifter, mens Helse- og omsorgsdepartementet skal sørge for at dei politiske vedtaka blir sette i verk.

Helse- og omsorgsdepartementet (HOD) har det overordna ansvaret for helsepolitikk, folkehelse, helsetenester, kommunale tenester til eldre og funksjonshemma, helselovgiving og delar av sosiallovgivinga i Noreg. HOD har òg ansvaret for alkohol- og narkotikapolitikken i Noreg. Helse- og omsorgsministeren er den øvste leiaren i departementet.

Folkehelseinstituttet (FHI) er eit statleg forvaltingsorgan som er underlagt Helse- og omsorgsdepartementet. FHI arbeider med forsking og analyse og skal produsere og formidle kunnskap som bidreg til god folkehelse. FHI gir råd til heile helsesektoren, inkludert Helse- og omsorgsdepartementet, og har òg ansvaret for at det er nok vaksinar tilgjengeleg.

Helsedirektoratet er òg underlagt Helse- og omsorgsdepartementet. Det skal styrke helsa til befolkninga gjennom heilskapleg og målretta arbeid på tvers av tenester, sektorar og forvaltningsnivå. Helsedirektoratet gir konkrete råd om helsefremmande og førebyggande tiltak, i tillegg til at dei har eit heilskapleg ansvar for den nasjonale helseberedskapen. Helsedirektoratet har òg ansvaret for autorisasjon av helsepersonell.

Helsetenesta i Noreg blir delt inn i ei primærhelseteneste og ei spesialisthelseteneste. Nokre helsetilbod er organiserte i fellesskap av kommunen og staten, som til dømes distriktsmedisinske senter, enkelte rehabiliteringstilbod og hospicetilbod.

Primærhelsetenesta

Kommunen skal sørge for at alle som bur i og oppheld seg i kommunen, uavhengig av alder, funksjonsnivå og etnisk bakgrunn, får tilbod om nødvendige helse- og omsorgstenester. Primærhelsetenesta er altså ansvaret til kommunen, og ho omfattar tenester som

• helsestasjon og skulehelseteneste
• fastlegeordning
• legevakt
• offentleg fysioterapiteneste

• jordmorteneste

• brukarstyrt personleg assistanse (BPA)

• institusjonsteneste

• rusomsorg og psykisk helsearbeid

Spesialisthelsetenesta

Spesialisthelsetenesta er ansvaret til staten. Ho er organisert i fire regionale helseføretak (RHF) som blir styrte av Helse- og omsorgsdepartementet. RHF-ene skal sørge for at dei som bur i eller oppheld seg i helseregionen, får tilbod om spesialisthelsetenester som til dømes

• sjukehus- og andre spesialisthelsetenester

• ambulanseteneste

• røntgentenester

• utdanning og opplæring av pasientar og pårørande

Fylkeskommunen skal sørge for at tannhelsetenester er tilgjengelege for alle som bur i eller oppheld seg i fylket. Fylkeskommunen har òg ansvar for hjelpemiddelsentralen.