Føremål med faget
Ein anleggsmaskinførar utfører varierte arbeidsoppdrag med ulike typar anleggsmaskinar og tilleggsutstyr. Anleggsmaskinførarfaget skal bidra til å dekkje samfunnet sine behov for vedlikehald og utbygging av infrastrukturen i landet. Anleggsmaskinføraren arbeider ofte i vanskelege terreng og område og kan gjere store inngrep i natur og miljø. Faget skal derfor bidra til å gi anleggsmaskinførarar ei medviten haldning til miljø- og ressursspørsmål.
Opplæringa
Opplæringa skal utvikle evna til å planleggje, gjennomføre og vurdere arbeidsoppgåver i tråd med brukaren sine behov og prioriteringane til samfunnet. Vidare skal opplæringa utvikle evna til å ta i bruk nye maskinar og metodar og nytt utstyr, handtere og vedlikehalde maskinane på ein forsvarleg måte og utvikle evna til å ta vare på tryggleiken til ein sjølv og andre.
Opplæringa skal leggje vekt på samarbeid med kollegaer og andre yrkesutøvarar på byggje- og anleggsplassar. Opplæringa skal leggje vekt på helse, miljø og tryggleik.