Tenk førebyggjande
Anleggsfaget har eit variert og spennande arbeidsområde. Arbeidet går føre seg både utandørs i all slags vêr og innandørs under varierande tilhøve. Vegbygging, grunnarbeid, rassikringar og arbeid på byggjeplassar er berre nokre eksempel. Å jobbe for eit trygt og godt arbeidsmiljø må heile tida vere i fokus. Tenk førebyggjande og ta val som ikkje utset deg eller andre for unødig risiko.
Fleire faktorar krev merksemd
Alle arbeidsplassar der ein arbeider med store maskinar, kan definerast som ein anleggsplass, stor eller liten. Då utstyrer ein seg med naudsynleg arbeidstøy og personleg verneutstyr ut frå den jobben som skal gjerast. På ein anleggsplass er det fleire faktorar som krev merksemd på HMS. Store maskinar krev merksemd grunna dårleg sikt. Det kan vere arbeid i skråningar, sikringar av fjell, tunnelarbeid eller sprengingsarbeid. Mange typar verktøy og utstyr krev vern, og ulike arbeidsoperasjonar er krevjande med stor grad av risiko. Eksempel på dette er pigghammar og steinklype.