Refleksjonsoppgåver om dyrking og lagring

Oppgåve 1. Grønsaksdyrking i nærområdet

Finn ut om det er grønsaksdyrkarar i nærområdet ditt. Kva typar grønsaker blir dyrka, og kvifor trur du desse typane er valde? Utforsk òg korleis klima og jordforhold i området påverkar grønsaksproduksjonen.

Oppgåve 2. Herding av småplanter

1. Kva betyr herding av småplanter, og kvifor er det viktig før utplanting?

2. Lag ei liste over ulike tiltak som kan gjerast for å herde ungplanter, som gradvis tilvenning til lys, temperatur og vindforhold. Diskuter korleis desse tiltaka bidreg til etableringa til plantene i åkeren.

Oppgåve 3. Solfangar i grønsaksdyrking

1. Kva meiner vi med bruk av solfangarar i grønsaksdyrking?

2. Undersøk kva typar solfangarsystem som er aktuelle, og korleis dei kan brukast for å forlenge vekstsesongen, redusere energikostnader eller halde oppe optimale temperaturar i veksthus eller drivhus.

Oppgåve 4. Fordelar med dyrking på drill

1. Utforsk fordelane ved å dyrke grønsaker på drill. Korleis påverkar denne metoden jordstruktur, drenering og plantevekst?

2. Finn ut kva grønsaker som eignar seg best for denne dyrkingsmetoden.

Oppgåve 5. Jordtype for tidlegproduksjon

1. Kva eigenskapar bør jorda ha for å vere eigna til tidlegproduksjon av grønsaker?

2. Diskuter kvifor lett, veldrenert og raskt oppvarmbar jord er viktig, og gi døme på grønsaker som trivst under slike forhold.

Oppgåve 6. Griffelrote på tomat

1. Finn ut kva griffelrote på tomatar skyldast, og kva tiltak som kan redusere risikoen for dette.

2. Diskuter korleis faktorar som vassbalanse, kalsiummangel og stress påverkar førekomsten av griffelrote.

Oppgåve 7. Maskinhausting av grønsaker

Diskuter i grupper om det finst grønsaker som ikkje kan haustast med maskin. Grunngi svara dykkar ut frå forma, skjørheita eller haustemodninga til grønsakene. Reflekter òg over korleis teknologi og innovasjon kan påverke mekanisk hausting i framtida.

Oppgåve 8. Førebygging av skadar og sjukdommar på lagra grønsaker

Undersøk korleis vi kan unngå skadar og sjukdommar på grønsaker som blir lagra på kjølelager. Vurder viktige faktorar som temperatur, luftfukt, ventilasjon og hygiene. Kva kan skje om desse forholda ikkje er optimale?

Oppgåve 9. Så- og planteplan for blomkål og hovudkål

Planlegg dyrking av blomkål og hovudkål i marknadshagen din med salsstart i byrjinga av august. Undersøk sortar som er eigna for sesongen, og lag ein plan som inkluderer:

• såtidpunkt

• plantetidspunkt

• plante- og radavstandar

• mengde planter

• forventa haustetidpunkt

Bruk nettsider frå frøfirma eller bøker til å finne informasjon, og noter deg viktige eigenskapar ved sortane du vel. Oppgi tidspunkta i vekenummer.