Oppgåve

Bruk Business Model Canvas

I denne oppgåva skal de bruke Business Model Canvas til å utvikle ein forretningsmodell for éin av casane nedanfor. Målet er å vise korleis verksemda kan skape verdi for kundane og samtidig vere økonomisk, sosialt og miljømessig berekraftig.

Skjematisk framstilling av forretningsmodellen Canvas. Skjemaet består av ni celler som representerer byggeklossane i ei bedrift. Lest frå venstre mot høgre, ovanfrå og ned, står følgande ord i cellene: Samarbeidspartnarar, Aktivitetar, Verdiløfte, Kunderelasjon, Kundesegment, Ressursar, Kanalar, Kostnadsstruktur og Inntektsstraum. Illustrasjon. — Business Model Canvas

Oppgåve

Utfylling av dei ni felta i modellen

Verdiløfte

Kva problem løyser de?
Kvifor skal kundane velje dykk framfor konkurrentane?

Kundesegment

Kven er kundane?
Er det ulike kundegrupper?

Kanalar

Korleis når de kundane?
Korleis bestiller eller kjøper dei produktet?

Kunderelasjon

Korleis skaper og beheld de gode kunderelasjonar?
Korleis får de kundane til å komme tilbake?

Ressursar

Kva treng verksemda for å fungere?
Kva for utstyr, kva slags tilsette, eller kva for kompetanse er viktig?

Samarbeidspartnarar

Kven bør de samarbeide med?
Kva for leverandørar er viktige?

Inntektsstraum

Korleis tener verksemda pengar?
Finst det fleire inntektskjelder?

Kostnadsstruktur

Kva er dei største kostnadene?
Korleis kan kostnadene haldast nede?

Aktivitetar

Kva må verksemda gjere for å levere verdien til kundane?

Slik jobbar de

Jobb i grupper på to eller tre elevar.
Teikn opp Business Model Canvas på ein stor plakat, eller bruk ei utskrift.
Bruk post-it-lappar til å fylle ut dei ni felta i Business Model Canvas. Då kan de enkelt endre og forbetre forretningsmodellen undervegs.
Bruk internett for å finne informasjon om marknaden, konkurrentar, kundar og moglege samarbeidspartnarar.
Førebu ein presentasjon på 5–7 minutt der de forklarer forretningsmodellen.

Case 1: " FarOut" – øyhopping på Sørlandet

Sørlandet er kjent for vakker skjergard med små uthamner, holmar og skjer. De ønsker å starte bedrifta FarOut, som tilbyr guida øyhoppingsturar med havkajakk.

Pakketurane kan inkludere

guide
kajakk
telt eller hengekøye
turutstyr
mat og drikke
transport av bagasje

Tenk over

Kven er målgruppa?
Kva gjer tilbodet unikt?
Korleis kan turane gjennomførast på ein miljøvennleg måte?

Case 2: Lokalavis

Mange lokalaviser opplever færre abonnentar på papir, men fleire digitale lesarar. Vel ei lokalavis de kjenner, og lag ein ny og berekraftig forretningsmodell.

Tenk over

Korleis kan avisa få fleire abonnentar?
Kva for digitale tenester kan de tilby?
Korleis kan avisa bli viktigare for lokalsamfunnet?
Kva for inntektskjelder kan utviklast?

Case 3: Vaktselskap

De ønsker å starte eit nytt vaktselskap som dekker framtidige behov i nærmiljøet.

Tenk over

Kven treng vakttenester?
Kva for tenester skal de tilby (vektartenester, arrangementssikkerheit, alarmutrykking, digitale sikkerheitsløysingar og så vidare)?
Korleis kan de skilje dykk ut frå konkurrentane?
Korleis kan verksemda drivast på ein berekraftig måte?