Korleis lage ein reklame?

Før du les

Sjå nærare på desse fagomgrepa før du les teksten:

blikkfang

noko som auga dine blir trekte mot. I ein reklameannonse kan til dømes eit stort bilete eller ein farge vere blikkfanget.

logo

eit bilete eller eit teikn som viser namnet på ei bedrift, ein butikk eller eit produkt

positivt ladde ord

ord som for mange vekker positive og gode kjensler

negativt ladde ord

ord som for mange vekker negative og dårlege kjensler

målgruppe

ei bestemd gruppe eller nokre personar som til dømes ein reklame er retta mot

kontrast

ei motsetning, at noko som er ulikt, står mot kvarandre – til dømes stor og liten

gjentaking

at noko blir gjenteke fleire gonger. Det kan til dømes vere at (delar av) den same teksten står fleire gonger i ein reklame.

logos

ei av dei tre retoriske appellformene. Logos handlar om å bruke fakta, logikk og fornuft for å overtyde nokon.

etos

ei av dei tre retoriske appellformene. Etos handlar om å få mottakar til å stole på deg.

patos

ei av dei tre retoriske appellformene. Patos handlar om å vekke kjensler hos mottakaren.

Kva er reklame?

Reklame er når nokon prøver å få deg til å legge merke til eit bestemt produkt, bli interessert og kanskje kjøpe det. Det kan til dømes vere ein reklame for eit par nye, kule sko på ei nettside eller ein informasjonskampanje på bussen som skal får deg til å bruke setebelte. I videoen under ser du fleire døme på korleis vi let oss påverke av reklame.

Eit døme frå Tine

Korleis skil reklamen din seg ut frå andre?

Når du skal lage ein reklame, må du tenke over korleis han kan skilje seg ut frå andre reklamar. Kva gjer at nokon stoppar opp og legg merke til akkurat din reklame?

Sjå på reklamen under for Go'morgen-yoghurt. I reklamen frå Tine er det brukt mange skarpe fargar som gir kontrast. Dermed skil reklamen seg frå mange andre reklamar, og det gjer at fleire legg merke til han.

Kva for verkemiddel skal du bruke?

Det er vanleg å bruke ulike verkemiddel for å påverke ved hjelp av reklame. Målet er at reklamen, og verkemidla du bruker, påverkar mottakaren så mykje, at hen får lyst til å kjøpe produktet eller gjere det reklamen ber om.

Vanlege verkemiddel i reklame er til dømes gjentaking og kontrast. Legg merke til korleis reklamen over har brukt Go'morgen-yoghurten i alle bileta som ei gjentaking. Det gjer at vi lettare hugsar produktet. Sjølve yoghurten er blikkfang i reklamen.

I reklamen for Go'morgen-yoghurt er det òg brukt positivt ladde ord som verkemiddel. Orda "Go'morgen" og "smakfullt måltid" er positivt ladde ord. Vi kan bli påverka av orda og få lyst til å kjøpe produktet fordi det reklamerer med at smaken er god.

Kva skal produktet heite?

Namnet på produktet ditt er òg viktig. Namnet "Go'morgen" speler på at dette er ei vanleg, hyggeleg setning å seie når vi møter kvarandre om morgonen. I tillegg kan det bety at det å ete produktet, gir deg ein god start på dagen, med andre ord gjer morgonen god. Namnet har altså dobbel betydning, noko som er ganske vanleg i reklamar.

Kven er målgruppa?

Du bør tenke over korleis du kan nå ønskt målgruppe best mogleg med reklamen din. Viss det er ungdom i alderen 13–20 år i målgruppa, er det lurt å tenke over kva som gjer ein typisk ungdom interessert. Språket, bileta, fargane og skrifttypen er døme på noko av det som bør passe til akkurat den målgruppa du vel. Kven trur du Tine har tenkt på som målgruppe for den fargerike reklamen sin?