Internasjonalt samarbeid i reiselivsnæringa

Reiselivsnæringa er ei verdsomspennande næring, og det finst fleire store internasjonale reiselivsorganisasjonar, der også Noreg er medlem. Dei to største er Verdsturismeorganisasjonen (UNWTO) og FN-organisasjonen for utdanning, vitskap, kultur og kommunikasjon (UNESCO).

UNWTO – den største turismeorganisasjonen i verda

UNWTO er FNs særorganisasjon for turisme. Over 150 land er med i organisasjonen. Noreg har vore medlem sidan 2008.

UNESCO og verdsarvlista

UNESCO skal bidra til fred, tryggleik og ei berekraftig utvikling gjennom samarbeid og utveksling av kunnskap og idear over landegrensene. I 2019 var talet på medlemsland 193, etter at USA og Israel melde seg ut same året.

UNESCO arbeider for å verne kultur- og naturarven i verda, og eit viktig ledd i dette arbeidet er verdsarvlista – ei liste over stader i verda som blir rekna for å vere dei viktigaste naturområda og kulturminna i verda. Verdsarvlista bestod i 2018 av 1 092 stader. Noreg har 8 stader på lista, mellom dei Røros, Rjukan og Bryggen i Bergen.

HOTREC – pådrivar for eit gunstig europeisk lovverk for reiselivsnæringa

HOTREC er ein paraplyorganisasjon for restaurantar, hotell, pubar og andre reiselivsbedrifter i Europa. Det er eit europeisk samarbeid med 40 nasjonale reiselivsorganisasjonar fordelte på 29 land, mellom anna Noreg ved NHO Reiseliv.

HOTREC driv lobbyverksemd med sikte på å påverke EU-regelverket til fordel for reiselivsnæringa. Mellom anna jobbar dei med å få rapporteringsplikt for Airbnb og andre liknande selskap.

Innovasjon Noreg i utlandet

Innovasjon Noregs satsing på reiseliv skal bidra til auka lønsemd, mellom anna gjennom at Noreg tek marknadsdelar internasjonalt. Satsinga består mellom anna av at Innovasjon Noreg

• prøver å påverke bransjen av internasjonale turoperatørar som sel reiser til Noreg
• legg til rette for at journalistar skal skrive om Noreg som eit interessant reisemål

Innovasjon Noreg har kontor i meir enn 30 land.

Innovasjon Noreg Reiseliv og Visit Norway

Det tidlegare Nærings- og handelsdepartementet har gitt Innovasjon Noreg Reiseliv ansvaret for å utvikle og halde ved like den offisielle reiseguiden til Noreg, Visit Norway.

Visitnorway.com er Innovasjon Noregs viktigaste distribusjonskanal i marknadsføringa av Noreg som ferieland, både i Noreg og internasjonalt.

Dei landa som er dei viktigaste marknadene for Noreg, har alle sin lokale variant av visitnorway.com, til dømes visitnorway.de i Tyskland. Dei lokale visitnorway-sidene er tilpassa dei respektive landa.