Nasjonal strategi for norsk reiseliv - Forretningsdrift (SR-SRL vg2) - NDLAHopp til innhald
Fagartikkel
Nasjonal strategi for norsk reiseliv
Nasjonal reiselivsstrategi 2030 blei ferdigstilt av Innovasjon Noreg i 2021 på vegner av regjeringa. Han har visjonen "Sterke inntrykk med små avtrykk". Strategien er utarbeidd i samarbeid med reiselivsnæringa i Noreg, og alle norske destinasjonar har bidrege med innspel.
For å kunne sikre ei berekraftig utvikling av reiselivet treng vi ei felles retning og felles mål. Pandemien blei brutal for reiselivsnæringa, sidan verda stengde ned. Samtidig gav ho oss ei moglegheit til å tenkje meir heilskapleg og berekraftig på gjenoppbygging og vidare utvikling etter pandemien. Dette er ein pådrivar i utviklingsarbeidet for norsk reiseliv, saman med teknologi, digitalisering og det grøne skiftet. Strategien er laga for å gi ei felles retning for berekraftig reisemålsutvikling fram til 2030.
Nærings- og fiskeridepartementet gav Innovasjon Noreg i oppdrag å utarbeide strategien. Det har Innovasjon Noreg gjort i samarbeid med med norsk reiselivsnæring og fleire andre offentlege og private fagmiljø, bransjar og sektorar. Det er ein strategi for ei heilskapleg utvikling av norsk reiseliv og Noreg som reisemål, med særleg vekt på perioden 2021–2024. I denne perioden skal strategien bidra til å løfte næringa ut av krisa forårsaka av covid-19-pandemien.
Diskuter i klassa
Kva trur de forfattarane av strategien meiner med visjonen i strategien?
Sterke inntrykk med små avtrykk
Både satsingsområda og tiltaka nemnde i strategien, er baserte på internasjonale analysar, trendar og utviklingstrekk. I tillegg har reiselivsfaglege råd og innspel frå ulike aktørar bidrege i strategiarbeidet.
Hovudmåla i strategien er omfattande, og for å klare å gjennomføre er næringa avhengig av eit tett samarbeid mellom private og offentlege reiselivsaktørar. Hovudmåla i strategien er:
Norsk reiseliv skal øke sin egen verdiskaping og bidra til jobbskaping i hele landet.
Norsk reiseliv skal bidra til at Norge blir et lavutslippssamfunn.
Norsk reiseliv skal bidra til attraktive lokalsamfunn og fornøyde innbyggere.
Norsk reiseliv skal levere så høy kundeverdi at betalingsvilje og gjenkjøp øker.
Hovudmåla med tilhøyrande delmål
Norsk reiseliv skal øke sin egen verdiskaping og bidra til jobbskaping i hele landet.
Vi skal øke eksportverdien av konsumet med 20 milliarder kroner innen 2030, og det innenlandske konsumet tilsvarende.
Vi skal øke antallet reiselivsrelaterte jobber i Norge med 25 prosent innen 2030.
Norsk reiseliv skal bidra til at at Norge blir et lavutslippssamfunn.
Vi skal redusere klimautslippene i det stedlige reiselivet med 50 prosent innen 2030.
Vi skal ha størst mulig andel gjester med høy verdiskapingseffekt og lavt klimaavtrykk. CO2-avtrykket fra de besøkendes transport til/fra/i Norge skal reduseres med ti prosent årlig, med 2019 som utgangspunkt.
Vi skal være en pådriver for at klimautslippene i hele transportsektoren går ned.
Norsk reiseliv skal bidra attraktive lokalsamfunn og fornøyde innbyggere.
Der reiselivsaktiviteten øker i omfang skal også sysselsetting og bosetting øke tilsvarende.
Handels- og servicetilbudet i reiselivs- og hyttekommuner skal være større enn innbyggertallet alene tilsier.
Vi skal øke direkte og indirekte ringvirkninger av reiselivskonsumet lokalt, gjennom å prioritere målgrupper med høyt lokalt forbruk.
Andelen innbyggere som mener at reiselivet bidrar til vekst og utvikling skal øke på alle typer reisemål.
Norsk reiseliv skal levere så høy kundeverdi at betalingsvilje og gjenkjøp øker.
Vi skal styrke vår posisjon som et mer komplett reisemål for nasjonale og internasjonale målgrupper, slik at potensialet innen kultur, matopplevelser og gode møter med lokalsamfunnene blir forløst.
I målgruppene som norsk reiseliv satser på skal forbruket øke med 25 prosent fram til 2030.
Gjennomføring og oppfølging
Alle private og offentlege reiselivsaktørar må samarbeide for å nå måla i reiselivsstrategien. Strategien må implementerast i dei ulike reiselivsaktørane sine eigne planar og strategiar for ei berekraftig reiselivsutvikling. Det strategiske arbeidet må følgjast opp som ein kontinuerleg prosess for at ein skal nå dei overordna måla innan 2030.
Kilde
Innovasjon Noreg. (7. april 2021). Nasjonal reiselivsstrategi 2030. Sterke inntrykk med små avtrykk. https://assets.simpleviewcms.com/simpleview/image/upload/v1/clients/norway/nasjonal_reiselivsstrategi_original_ny_cad86af3-d2e9-486d-9c4e-7d1e7709ca32.PDF
Regjeringa. (6. mai 2021). Pressemelding. Nye tiltak skal restarte reiselivet på vei ut av pandemien. https://www.regjeringen.no/no/aktuelt/nye-tiltak-skal-restarte-reiselivet-pa-vei-ut-av-pandemien/id2847863/
