Kartlegging av reiselivet

Det er mange ulike aktørar, både private og offentlege, som kartlegg ulike område innanfor reiselivet i Noreg. Nokre av dei største er Innovasjon Norge Reiseliv, Statistisk sentralbyrå og NHO Reiseliv. I tillegg er det nokre forskingsinstitusjonar som kartlegg på oppdrag.

Kvart år intervjuar Innovasjon Norge tusenvis av norske og utanlandske turistar på ferie i Noreg. Målet er å kartleggje føremålet med reisa, korleis dei reiser og kven dei reiser saman med. I tillegg blir aktivitetar og pengebruk kartlagd. Kva er ønskte aktivitetar, kva blei gjennomført, og kor fornøgde var dei med aktivitetane? Funna blir publiserte i ein stor rapport og er eit nyttig verktøy for reiselivsaktørane i Noreg.

Fire gonger i året gjennomfører SSB Reiseundersøkelsen, som har som føremål å kartleggje reisevanane til nordmenn i Noreg og i utlandet.

NHO Reiseliv engasjerer mellom anna Telenor og Norsk Gallup til å gjennomføre ulike kartleggingsundersøkingar. Til dømes gjennomførte dei hausten 2019 ei kartlegging av reiseplanane til nordmenn for haustferien og hausten generelt. NHO Reiseliv publiserer resultat frå slike undersøkingar på nettsidene sine.

Senter for reiselivsforskning kartlegg forskings- og utviklingsbehovet for reiselivet i Innlandet. Føremålet med dette er å få betre kjennskap til kva tema og område aktørane sjølv vurderer som dei mest sentrale.

MIMIR er eit døme på ei reiserådgivingsteneste som kartlegg og gjennomfører moglegheitsstudium, analysar og utgreiingar for reiselivet på oppdrag. Dei leverer rådgivingstenester både til private bedrifter og offentlege etatar, som Innovasjon Norge. Kjernekompetansen deira er:

reisemålsutvikling, markeds- og konseptvurderinger, opplevelsesdesign og attraksjonsutvikling, klyngeutvikling og prosjektledelse, samt ulike typer analyser og utredninger.