Bedrifters verdikjede og utkontraktering
![Fleire hender trekker i eit tau. Foto.](https://api.ndla.no/image-api/raw/176614823.jpg?width=1024&cropStartX=100&cropEndX=0.024814293032786885&cropStartY=95.24779524539878&cropEndY=0.002396472392638037)
Verdikjede
Omgrepet verdikjede har fleire bruksområde. I denne samanhengen bruker vi det innan forretningsstrategi og til å forstå korleis enkeltbedrifter oppnår verdiskaping.
Verdikjedeaktivitetane i ei bedrift kan delast i to hovudkategoriar.
Primæraktivitetar, eller hovudaktivitetar, er aktivitetar som direkte bidreg til å skape inntekt. Sjølve produksjonen som bedrifta gjer, sal og marknadsføring er døme på primæraktivitetar.
Sekundæraktivitetar, eller støtteaktivitetar, er støttetenester som trengst for at primæraktivitetane skal kunne fungere – og fungere godt. Døme på dette kan vere utviklingsarbeid, økonomi, reinhald, personalforvaltning og leiing.
Andre bruksområde for omgrepet verdikjede
Omgrepet verdikjede har fleire bruksområde, som det kan vere greitt å vite om:
Global verdikjede
I globale verdikjeder ser vi på produksjon som er delt opp og blir utført i ulike delar av verda og av ulike bedrifter. Etikk og berekraft i globale verdikjeder er sentrale tema for tida.
Sirkulær verdikjede
Sirkulære verdikjeder handlar om å forlenge tida ein utnyttar ressursar. Det kan gjelde resirkulering av råstoff for produksjon av nye varer og gjenbruk av produkt, til dømes ved å ha ein sekundærmarknad for brukt utstyr.
Utkontraktering (outsourcing)
Utkontraktering (outsourcing) er når ei bedrift set ut aktivitetar og tenestedrift til eksterne leverandørar i staden for å ha tilsette, utstyr og ekspertisen internt i bedrifta.
Det finst fleire årsaker til at bedrifter utkontrakterer oppgåver. Det kan vere at dei ønsker å
auke lønnsemda ved å ha færre tilsette
straumlinjeforme bedrifta ved å legge vekt på primæraktivitetane til bedrifta
redusere behovet for lokale og utstyr
innhente kompetanse som berre er nødvendig i periodar
Eit enkelt døme på utkontraktering kan vere produksjon og drift av nettsider. Dei fleste bedrifter har behov for ei nettside, men utviklinga av nye nettsider tek ei avgrensa mengde tid og krev veldig spesialisert kompetanse, og seinare driftsoppgåver er avgrensa. For dei fleste bedrifter er det derfor upraktisk å tilsetje eigne webutviklarar, og mange vel heller å kjøpe inn dette frå ein ekstern aktør.
Kva oppgåver kan utkontrakteres?
Som nemnt deler vi oppgåvene til bedrifta i primæraktiviteter og sekundæraktiviteter. Primæraktiviteter blir sjeldan utkontraktert. Det er viktig at det finst intern kompetanse om dei, og sidan det er desse bedriftene tener pengar på, er det risikabelt å setje dei ut til andre.
Det er meir vanleg å utkontraktere sekundæraktivitetar. Det kan til dømes vere økonomi og lønn, utvikling og reinhald.
IT-tenester og IT-drift blir ofte utkontraktert. Ei spesiell årsak til det er behovet for spisskompetanse innan IT-sikkerheit.
Relatert innhald
Nettside hos snl.no