Er utviklinga i verda berekraftig?
Denne oppgåva bygger på fire ulike ressursar:
Mål med oppgåva
I denne oppgåva skal de
øve dykk på å sjå ei sak frå fleire sider
få auka forståing for at berekraftig utvikling er komplekst og kan handle om veldig mykje forskjellig
1. Førebuingar: Fordeling og fordjuping
Del klassen i tre grupper. Kvar gruppe skal fordjupe seg i ein eller to artiklar. I tillegg må de gjerne bruke andre kjelder til å finne informasjon om temaet.
Gruppe 1: "Berekraftig utvikling og FNs berekraftsmål" og "Bryllaupskakemodellen". Korleis blir det forklart i artiklane kva berekraftig utvikling er, og kva er dei tre dimensjonane ved berekraft? Kvifor har ein valt å seie at klima og miljø er viktigast i bryllaupskakemodellen?
Gruppe 2: "Antropocen – mennesket sin tidsalder". Kva står det i denne artikkelen om korleis det går med naturen, og korleis vi menneske bruker naturen i dag? Er denne utviklinga berekraftig?
Gruppe 3: "Det går ganske bra med verda". Korleis går det med verda og utviklinga i verda ifølge denne artikkelen? Kva argument kan de hente herfrå som taler for at utviklinga er positiv?
2. Arbeid i grupper: Les artiklane og noter argument
Les artikkelen eller artiklane individuelt og noter stikkord. Sjå på spørsmåla knytte til artiklane i avsnittet over. Prøv å finne argument både for og imot at utviklinga vår er berekraftig i dag.
Gå saman i gruppa eller i par og del det de har funne. Noter ned ulike argument for om utviklinga er berekraftig eller ikkje.
3. Diskusjon: Diskusjon med ordstyrar og referent
Det store spørsmålet som skal diskuterast, er om utviklinga vår i dag er berekraftig eller ikkje. Målet er å få fram ulike argument.
Gå saman i mindre grupper, med elevar frå kvar av dei tre opphavlege gruppene representerte i kvar gruppe. Gruppa vel ein ordstyrar og ein referent. Ordstyraren styrer diskusjonen, mens referenten skriv ned argumenta som kjem fram. Resten av gruppa diskuterer.
Til læraren
Denne delen kan løysast på ulike måtar alt etter kva som passar for gruppa. Her er to andre forslag til organisering:
Plenumsdiskusjon: Heile klassen jobbar saman. Læraren er ordstyrar. I tillegg kan det gjerne veljast ein referent som skriv ned argumenta som kjem fram. Heile klassen diskuterer saman om utviklinga i dag er berekraftig.
Paneldebatt: Ein eller to frå kvar av dei opphavlege gruppene blir med i eit panel. Læraren er ordstyrar. I tillegg kan gjerne ein elev notere ned argumenta. Resten av klassen lyttar til debatten.
Denne videoen kan vere nyttig for deg som lærar å sjå på før du skal leie diskusjonar i klassen:
Video: Korleis kan lærarar legge til rette for gode diskusjonar?
4. Debrifing: Samanfatt i klassen
Læraren samlar trådane i ein klassesamtale. Kva kan vi seie kjenneteiknar berekraftig utvikling? Og kva argument har klassen komme fram til?
Snakk gjerne om korleis prosessen i gruppene har vore, og korleis diskusjonane gjekk.
Til læraren
I den didaktiske metoden "Tren tanken" blir den avsluttande klassesamtalen kalla debrifing (Nolet, 2022, s. 256–257). Denne har gjerne tre ulike delar som er meint å hjelpe elevane å bli bevisste si eiga tenking og læring.
Innleiingsfase: Her spør du som lærar litt om prosessen. Korleis har elevane gått fram? Kva var vanskeleg? Kva var enkelt? Korleis løyste elevane ueinigheiter?
Den faglege fasen: Her går du gjennom løysingsforslaga til elevane og det faglege innhaldet dei har komme fram til.
Overføringsfasen: Her forsøker du å vise korleis det elevane har lært, og måten dei har lært på gjennom denne oppgåva, kan overførast til andre tema.
Kjelde
Nolet, R. (2022). Tren tanken med geografi. I R. Mikkelsen & P. J. Sætre (Red.), Geografididaktikk for klasserommet (4. utg,. s. 251–278). Cappelen Damm Akademisk.