Del 1: Førebuing
Finn ein person som har eit anna livssyn enn deg sjølv og vil vere med på eit intervju. Det kan til dømes vere ein person med ein annan religion.
Førebu intervjuet ved å lage forslag til ulike spørsmål du har lyst til å få svar på.
Forslag til spørsmål:
Kva er eksistensielle spørsmål etter di meining?
Kva for nokre eksistensielle spørsmål er viktige for deg?
På kva måte er desse eksistensielle spørsmåla viktige med tanke på ditt eige livssyn?
Korleis prøver du å svare på dei eksistensielle spørsmåla?
Kva svar kan ditt eige livssyn gi på desse spørsmåla?
Er det nokon andre viktige personar, religionar eller livssyn som har inspirert deg eller gitt deg nokon verdifulle innspel?
Eit intervju er eit lite forskingsprosjekt. Det er derfor viktig at du følgjer nokre grunnleggjande forskingsetiske normer og reglar.
Forskingsetiske normer og reglar
Deltakinga skal vere frivillig, og dei som deltek, kan når som helst trekkje seg frå undersøkinga.
Dei som deltek, må vite kva slags undersøking dei skal vere med på og gi informert samtykke.
Du må behandle deltakarane med respekt og til dømes akseptere at det er somme spørsmål dei ikkje ønskjer å svare på.
Du bør unngå å spørje om sårbare tema som til dømes seksuelt misbruk og vald i nære relasjonar.
Dei som deltek, skal vere anonyme. Det skal derfor ikkje vere mogleg å kunne identifisere konkrete enkeltpersonar når du presenterer resultata.
Observasjonar og svar skal behandlast konfidensielt. Du kan ikkje lagre observasjonar og svar saman med reelle namn. Bruk i staden fiktive namn, pseudonym eller dekknamn.
Svara og observasjonane du samlar inn, må gjengivast objektivt, nøytralt og presist. Du må ikkje utelate viktig informasjon, forfalske svar eller observasjonar, eller prøve å tilpasse materialet ein bestemd konklusjon.
Del 2: Gjennomfør intervjuet
Avtal tid og stad for intervjuet og gjennomfør samtalen. Det kan vere lurt å finne ein stad som er uforstyrra, så ingen andre høyrer kva de snakkar om. Då kan det bli lettare å få til ein open og fortruleg samtale. Sjå fleire tips til korleis du kan gjennomføre intervjuet under.
Tips til intervju
Avtal intervjuet på førehand
Start gjerne med enkle spørsmål
Still korte spørsmål som er lette å forstå
Ikkje still fleire spørsmål på ein gong
Ikkje still leiande spørsmål
Ver ein interessert lyttar
Observer kroppsspråket til informanten
Forsøk å skape ei trygg og hyggjeleg stemning
Be gjerne informanten utdjupe svara sine
Lag gjerne ei hugseliste med tema, stikkord og spørsmål, men ikkje følg henne slavisk
Still oppfølgingsspørsmål viss det dukkar opp noko interessant
Ta opptak av samtalen eller noter undervegs
Del 3: Etterarbeid
Innhent meir informasjon om religionen og livssynet til personen du har intervjua.
Gi ei kort skildring av religionen og livssynet til personen du intervjua.
Er det nokon av svara til intervjupersonen som kan knytast til læra i religionen eller livssynet? Gi konkrete døme.
Diskuter korleis religionen eller livssynet til intervjupersonane kan vere med på å forklare kva spørsmål dei var opptekne av, og kva for svar dei kom fram til.
Ta perspektivet til andre!
Når du er ferdig med intervjuet og etterarbeidet, kan du be den du har intervjua lese gjennom det du har skrive. Kjenner personen seg igjen i skildringane dine? Kvifor? Kvifor ikkje?
Del 4: Presentasjon
Presenter det du har komme fram til. Det kan vere ein skriftleg eller ein munnleg presentasjon.
Tips til presentasjonar: 11 kreative tips til framføringer