Bryllaupskakemodellen

Begrensa bruk

Bilete: FN-sambandet

FNs berekraftsmål består av 17 mål og 169 delmål. Når det er så mange mål, kan det vere vanskeleg å halde oversikt og bestemme kva ein skal gjere noko med. Alle måla og delmåla er naturlegvis viktige, men ein person, ei bedrift, ein kommune eller eit land klarer ikkje å gjere noko med alle desse måla og delmåla på ein gong. Derfor må vi kanskje velje det som er viktigast for oss, prøve å gjere noko med det og samtidig prøve å unngå å påverke dei andre måla på ein negativ måte.

Kva trur du denne modellen prøver å vise?

Opne bilete i eit nytt vindauge

CC BY-NC-ND

Bilete: Jerker Lokrantz/Azote

I utgangspunktet er alle FNs berekraftsmål likestilte; ingen mål er viktigare enn andre. Men forskarar ved Stockholm Resilience Centre har laga ein modell kalla bryllaupskakemodellen, som viser at nokre mål faktisk er viktigare og meir grunnleggande enn andre. Planeten vår har nemleg nokre tolegrenser, og derfor må berekraftsmåla som handlar om å bevare naturen og miljøet og å stoppe klimaendringane, bli sette først. Vi kan ikkje gå utover tolegrensene til planeten, for det vil føre til konsekvensar som vil gjere det vanskeleg for oss menneske å leve her.

Modellen viser òg at dei ulike berekraftsmåla heng saman og er avhengige av kvarandre. Om vi skal bidra til ei berekraftig utvikling, kan vi derfor ikkje berre velje oss eitt mål og ikkje bry oss om dei andre. Dersom vi til dømes skal klare å ha ansvarleg forbruk og produksjon (mål nummer 12), må vi ha rein energi (mål nummer 7). Dersom vi skal produsere rein energi på ein måte som bidreg til berekraftig utvikling, må det hjelpe til med å stoppe klimaendringane (mål nummer 13), og det bør ikkje gå utover livet på land (mål nummer 15) eller livet i havet (mål nummer 14).

Dei tre laga i bryllaupskakemodellen

Det er vanleg å dele inn berekraftig utvikling i tre dimensjonar: klima og miljø, sosiale forhold og økonomi. Kvar av desse tre dimensjonane er representerte ved kvart sitt nivå eller lag i bryllaupskakemodellen.

Berekraftsmåla som er knytte til klima og miljø, er plasserte nedst ende for å vise at dei er mest grunnleggande. Dei er altså basen eller fundamentet til kaka. Den sosiale og økonomiske utviklinga må gå føre seg innanfor tolegrensene til planeten. Vi kan derfor seie at dei fire måla som handlar om klima og miljø, er de viktigaste og mest grunnleggande av alle dei 17 berekraftsmåla.

Det neste nivået i bryllaupskaka bygger på klima og miljø og handlar om samfunnet og sosiale forhold. Det er viktig at utviklinga innanfor desse måla ikkje går utover klima og miljø.

Øvst i bryllaupskaka har vi økonomi. Når vi skal oppnå berekraftsmåla for økonomi, må det gå føre seg på ein slik måte at måla for sosiale forhold og for klima og miljø òg blir oppfylte. Økonomien bygger på og er avhengig av dei to andre nivåa i modellen. Samtidig kan økonomien òg innrettast på ein sånn måte at det hjelper oss til å oppnå dei andre berekraftsmåla.

Bruk den interaktive presentasjonen eller den skriftlege framstillinga under for å studere nivåa i bryllaupskakemodellen nærare. I den interaktive presentasjonen går det an å trykke på eit berekraftsmål for å forstørre det.