Tekstur
Tekstur er korleis ei overflate ser ut eller kjennest. Alle overflater har tekstur. Du kan til dømes oppleve ei form som mjuk eller hard, blank eller matt, glatt eller ru. Viss vi set ulike teksturar opp mot kvarandre, kan vi skape kontrastar i overflatene.
Taktil tekstur
Taktil tekstur er korleis ei overflate kjennest når du tek på henne. Ho har ein tredimensjonal verknad.
Visuell tekstur
Visuell tekstur er korleis ei overflate ser ut. Vi kan bruke visuell tekstur til å lage ein illusjon. Det vil seie at vi kan skape ei førestilling som ikkje er verkeleg. Du kan til dømes teikne noko på eit glatt papir og få det til å sjå lodent ut ved å bruke ulike gråtonar og skraveringsteknikkar.
Tekstur i måleri
Eit døme på korleis vi kan skape visuell tekstur er måleriet Soverom i Arles. Det er laga av den verdskjende nederlandske kunstnaren Vincent van Gogh i 1889. Van Gogh er kjend for å ha modernisert måleteknikkar. Han jobba med å uttrykke ulike stemningar, mellom anna gjennom å eksperimentere med tekstur.
Van Gogh brukte gjerne korte, parallelle penselstrok og sterke fargar. Dette var eit tydeleg brot med tradisjonelle teknikkar brukt av tidlegare målarar som jobba med å framstille verkelegheita så realistisk som mogleg.
Utforsk korleis kunstnarar har jobba med tekstur
Finn bilete av teikningar eller måleri der ulike overflater blir gjengitt. Studer korleis kunstnarane har jobba for å få fram teksturar i motiva sine.
Sitt saman i grupper på tre og del bileta de har funne. Diskuter ulike overflateverknader.
Relatert innhald
Finn ulike teksturar, og lag avtrykk av dei. Etterpå kan du bruke erfaringane dine til å skape ditt eige uttrykk.
Bruk valørar og skravering når du skal teikne ein studie av eit strikkestoff eller eit anna tekstil med tydeleg tekstur.