Del 1: Ein hest i regnet
Diktet du skal lese har "hestar i regn" som motiv. Før du les diktet, skal du prøve å beskrive kva kjensler hestar som står i regnet utløyser hos deg.
Sjå på biletet av hesten i regnet øvst på denne sida. Beskriv hesten. Kva slags blikk har han? Kva sinnstilstand verkar han å vere i? Korleis er omgivnadene rundt han?
Sjå videoen under. Beskriv alle kjenslene filmen vekkjer i deg. Beskriv også hestane – korleis ser dei ut til å ha det der dei står i regnet?
Samanlikn svara dine med svara til andre i klassen.
Diskuter: Klarte de å sjå filmen om hestane utan å bli rastlause? Eller spreidde det seg ei uro i dykk? I så fall – kvifor?
Synstolking av video
Filmen viser ei blanding av stillbilete og videoopptak av hestar som står og beitar i tåke og regn. Han viser også tretoppar og himmel. Det er veldig lite bevegelse og hendingar. Det er heller ikkje musikk i filmen, og stemninga er ganske mørk og dyster. Tittelen er "the ethereal melancholy of seeing horses in the cold".
Del 2: Les diktet "Hestene står i regnet"
Jobb åleine
Les diktet "Hestene står i regnet" stille for deg sjølv. Du finn det på Nasjonalbiblioteket.
Skriv ned det du meiner er temaet til diktet.
Øv deg på å lese diktet høgt. Tenk nøye over korleis du vil gjere det for å formidle stemninga og temaet i diktet.
Gå saman i grupper
Les diktet høgt for kvarandre. Diskuter kvifor de las diktet akkurat som de gjorde.
Kva stemning synest de det er i diktet? Grunngi ved å vise til tekstsitat.
Kva meiner de er temaet i diktet?
Del 3. Nærles diktet
No skal vi øve på å nærlese diktet. For korleis bidreg form og skrivestil til å formidle temaet? Du kan sjå eit døme på nærlesing av dikt over.
Jobb åleine
Les strofe 1
Kva for fire adjektiv blir brukte for å beskrive sinnet/tankane til det lyriske eget?
Kva for tre adjektiv blir brukte for å beskrive naturen?
Samanlikn adjektiva som blir brukte om høvesvis sinn/tankar og natur. Kva funksjon vil du seie samanstillinga av desse adjektiva har i diktet?
Les strofe 2
Les dei fire første verselinjene høgt for deg sjølv. Her er det bokstavrim. Finn du det? Les verselinjene med ekstra trykk på bokstavrimet. Kva funksjon har det i diktet?
Ein del av orda i denne strofa har erotiske konnotasjonar. Finn dei og forklar kva funksjon dei har i diktet. Legg merke til kva som blir tillagd erotikk – menneske eller natur?
Les strofe 3
I dei tre første verselinjene er det assonans. Finn du han? Korleis vil du lese orda som har lik vokallyd?
Ordet ”være” har forfattaren sjølv utheva. Kvifor trur du ho har gjort det?
I dei tre siste verselinjene er det ein kontrast mellom korleis det lyriske eget beskriv eigne tankar og den tilstanden det drøymer om å vere i. Finn kontrasten og forklar korleis han framhevar tematikken i diktet.
Jobb i par
Gå gjennom svara de skreiv på oppgåvene over.
Del 4: Korleis kan diktet vere aktuelt på 2000-talet?
Skriv ein tekst på cirka 500 ord der du reflekterer over korleis diktet kan vere aktuelt for oss som lever på 2000-talet. Du kan til dømes utforske desse tankane:
Kan vi kjenne oss igjen i ein lengsel etter å berre vere? Kva er det i så fall vi lengtar bort frå?
Går det an å kjenne seg igjen i verselinjene som handlar om at "sinn" og "hjarte" er fylte opp av tankar og draumar som overmannar eget og får det til å kjenne seg som i feber? Korleis kan tilstanden hestane er i vere ein lengsel bort frå dette?
Mange vil nok synast at det å leve som hestar i regnet vil verke usannsynleg kjedeleg. Likevel lengtar det lyriske eget etter dette. Kvifor då, trur du?