Eit godt bilete kan erstatta mange ord, og seinare skal vi bruka foto i rapportar, når vi skal dokumentera ei arbeidsoppgåve eller når vi skal presentera eit produkt eller ei teneste for andre.
I dette arbeidsoppdraget skal du først finna bilete du liker, og verta bevisst på kvifor du liker dei. Du skal ta eigne bilete, læra å redigera og deretter å dela dei med resten av klassen.
Dette skal vi gjera:
Vi skal jobba med temaet i fire økter:
Økt 1 (ca. 45 minutt):
- Læraren styrer denne delen.
- Vi diskuterer kva vi kan bruka bilete til generelt, og spesielt i naturbruksfaga på skulen. Deretter ser vi på bilete andre har teke (i plenum), og diskuterer kva som kjenneteiknar eit godt bilete.
- Læraren viser korleis vi kan redigera bilete på ein enkel måte.
Økt 2 (ca. 15 + 30 minutt):
- Elevane jobbar to og to saman.
- Finn minst tre foto av natur/landskap/dyr som de synest er gode.
- Kopier nettadressene og legg dei inn i eit digitalt dokument som alle i klassen og læraren har tilgang til på nettet. Grunngi kort kvifor de synest biletet er godt.
- Alle bileta vert viste i klassen før vi startar på tredje økta.
Økt 3 (ca. 1,5 timar):
- Last inn eit fotoredigeringsprogram på pc-en din (læraren kan gi tips om gratis program).
- Jobb individuelt: Gå ut og ta minst 20 bilete med eitt av desse temaa:
- «Haust»
- «Skulen min»
- «Maskiner»
- «Dyrevenner»
- «Både tobeinte og firbeinte har føter»
- «Planter til glede og planter til plage»
- «Arbeidsoppgåver på skulegarden»
- Rediger bileta du har teke.
- Vel ut ca. fem–ti bilete og last dei opp i eit delt dokument (læraren fortel kvar). Minst eitt av bileta skal visast i to versjonar: før redigering og etter redigering.
Økt 4 (ca. 1–1,5 timar):
- Kvar elev presenterer fem–ti av bileta sine for læraren og dei andre i klassen.
- Alle skriv eigenvurdering og svarer på spørsmål om bruken av bilete.
Dette treng vi:
- PC eller nettbrett
- internett-tilgang
- NDLAs sider om fotografering
- fotoapparat eller mobiltelefon som kan ta bilete
- kabel til overføring av bilete frå kamera eller telefon til pc eller nettbrett
Etter at dette arbeidsoppdraget er fullført, kan du:
- finna minst tre eksempel på det du meiner er eit godt foto med tema natur eller menneskeleg aktivitet knytte til natur
- fortelja kvifor du synest dette er eit godt bilete
- ta digitale bilete og overføra dei til pc-en
- installera biletredigeringsprogram på din eigen pc
- bruka redigeringsprogrammet til å:
skjera bilete
retta opp bilete
endra eksponering/lys i bilete
fjerna raude auge
laga album av utvalde bilete
gjera om frå farge til svart-kvitt-bilete
eventuelt leggja til tekst på bilete og laga kollasj av fleire bilete
- forklara ein annan i klassen korleis du utfører punkta a–g over
Vurdering:
Utfør eigenvurdering ved hjelp av dette skjemaet: Eigenvurdering: På fotojakt
Filer
Avtal med læraren korleis arbeidet skal vurderast med karakter.
CC BY-SASkrive av Tone Olavsdotter Mosebø.
Sist fagleg oppdatert 13.11.2017