Jordarbeiding

Hensikta med jordarbeiding er å lage eit godt såbed slik at kornplantene får gode spire- og vekstvilkår. Du bør ikkje starte jordarbeidinga på våren før jorda er det vi kallar lagleg. Det betyr at jorda må ha tørka litt opp før vi køyrer utpå med traktor og reiskap.

Er du for tidleg utpå, kan du øydelegge jordstrukturen og få varige pakkeskadar i jorda. Pakking av jorda fører til at små og store porer i jorda blir øydelagde. Intakte porer sikrar tilgang på luft og vatn for både planter og dyr i jorda. Pakking fører til dårleg drenering, dårleg rotutvikling og dårlegare vilkår for dyrelivet i jorda. Dette er negativt for planteveksten.

Film om lagleg jord (7:04)

Sjå filmen, og svar på oppgåver etterpå.

Oppgåver til filmen

1. Kva krefter påverkar vatnet i jorda?

2. Kvifor sjekkar vi laglegheita til jorda lenger ned i jorda enn der vi skal så?

3. Kva slags struktur har jord som ikkje har pakningskadar?

4. Kva er mold? Kvifor er det gunstig med mold i jorda?

5. Kva blir meint med feltkapasitet?

6. Korleis bør aggregata i jorda fordele seg ? Kvifor er det slik?

For at korna vi sår, skal få best moglege spireforhald, bør såbedet bestå av ulike sjikt eller lag. Såkornet bør ligge på ein litt fast grunn med eit sjikt med fine aggregat over. Over dette sjiktet vil vi ha litt større aggregat som vernar mot gjenslemming og skorpedanning om vi får kraftig regn rett etter såing.

Kva for reiskap du skal nytte i jordarbeiding, varierer etter jordtype og eigne erfaringar. Slodden jamnar ut jorda etter pløying, og harva smuldrar, jamnar ut og blandar jorda. Det finst fleire typar både av sloddar og harver som eignar seg til ulike jordtypar.