Informasjon om kunden
Kunden er eit ungt par, Anita og Tom på 30 år, og sonen deira Fredrik på 3 år. Dei har nettopp flytta inn i eit nytt hus og ønskjer å friske opp to av soveromma med eit nytt og originalt uttrykk på veggene. Paret liker interiørtrendar med eit handmåla uttrykk og vil at du skal ta utgangspunkt i interessene deira.
- Du skal eksperimentere med både abstrakte og figurative element for å finne fram til eit spennande formspråk.
- Kunden vil at du skal arbeide etter mønster-i-mønster-prinsippet. Det vil seie at du skal bruke store gjentakingar og mindre gjentakingar i same mønster.
- Vel mellom å lage tapet til begge soveromma eller berre eitt av dei.
Rom 1: Anita og Tom sitt soverom
Soverommet til Anita og Tom er 4 m x 4 m og 16 m² stort.
Her skal du ta utgangspunkt i interessa deira for naturen. Begge bruker mykje tid i hagen og på turar i skog og fjell. Paret ønskjer seg eit tapet med eit harmonisk og organisk utrykk inspirert av naturlege former og teksturar.
Rom 2: Fredrik sitt soverom
Soverommet til Fredrik er 4 m x 3 m og 12 m² stort.
Fredrik er ein kreativ gut som elskar dyr og eventyr. Han er glad i fargar og har ein livleg fantasi. Foreldra vil gjerne at tapetet på rommet hans skal vere leikent og positivt.
Del 1 – moodboard
Vel eitt av eller begge soveromma og finn gode bilete på nettet som viser kva retning du ønskjer å jobbe i. Ta med figurar, former, teksturar og fargar som inspirerer deg, og bruk referansebilete av tapet og mønster som viser kva stil og stemning du vil ha. Hugs at kunden vil at tapetet skal spegle dei personlege interessene deira, og finn inspirasjon frå handmåla uttrykk.
Søk gjerne inspirasjon i Pinterest-tavler. Her er eit par døme:
Del 2 – idéutvikling
På bakgrunn av moodboardet ditt skal du lage idéskisser. Her skal du eksperimentere med ulike måleteknikkar og forenkle, stilisere og abstrahere elementa frå moodboardet slik at det blir di eiga tolking.
Del 3 – fargekontrast
Du skal utforske ein fargekontrast, til dømes lys–mørk-kontrasten eller kald–varm-kontrasten, og arbeide med fargegradering og fargemøte. Her kan du velje om fargane skal bevege seg forsiktig ton-i-ton, eller om du ønskjer eit meir kontrastfylt uttrykk der du set fargane opp mot kvarandre.
Del 4 – mønsterutvikling
- Skann skissene frå idéutviklingsfasen og legg dei i ei eiga mappe på PC-en.
Test ulike prinsipp for mønsterbygging i eit digitalt teikneprogram, til dømes Illustrator.
- Prøv ut gruppering, spegling og rapportering.
- Bruk gjerne både stor og liten skala i same mønster for å gjere det meir interessant.
- Tenk over rytme, komposisjon og storleiksforhold, og eksperimenter med ulike mønster og fargar før du gjer eit val.
Illustrator
For å kunne arbeide med skissene dine i Illustrator må du først vektorisere dei. Sjå korleis du gjer dette, i denne YouTube-filmen om vektorisering av måla mønsterelement i Illustrator.
Del 5 – tapet og ferdig produkt
- Vel eitt mønster (to om du har valt å jobbe med begge soveromma) og skriv ut dette som ei tapetremse i målestokk 1 : 1 på ein plottar.
- Lag ein 3D-modell av rommet/romma med tapetet du har valt, i målestokk 1 : 20.
Del 6 – presentasjon
Du skal dokumentere designprosessen med foto og skisser gjennom heile prosjektet. Lag ein digital presentasjon der du med bilete og litt tekst viser utviklinga frå idé til ferdig produkt.
Presentasjonen skal innehalde
- moodboard til soverommet/soveromma
- idéskisser – framhev dei skissene du har valt
- mønsterskisser – vis kva fargekontrast, komposisjon og mønsteroppbygging du har brukt
- mønsteret/mønstera du har valt, i målestokk 1 : 1
- ei visualisering av tapetet i ein romleg kontekst
- eit bilete av ein 3D-modell med tapetet du har valt, i målestokk 1 : 20
- ei kort skildring av arbeidsprosessen din frå idé til ferdig resultat
Del 7 – innlevering
Du skal levere inn
- ei remse av tapetet/tapeta i målestokk 1 : 1
- 3D-modellen av rommet/romma med tapetet i målestokk 1 : 20
- den digitale presentasjonen som viser arbeidsprosessen din
Relatert innhald