Møbelstoff blir brukt til å kle alle typar sitjemøblar som er polstra. At eit møbel er polstra, betyr at det er kledd med mjukt materiale som gjer møbelet behageleg å sitje i. Møbelstoffet blir festa over polstringa.
Martindale slitasjetest
For å vite at eit tekstil er sterkt nok til å brukast som møbelstoff, kan vi sjekke kor mange martindale stoffet har. Martindale er ein slitasjetest som dr. J.G. Martindale fann opp like før andre verdskrigen. I dag blir brukt ei maskin til å teste alle typar tekstilar, klede og teppe. Runde tekstilprøver blir gnidde mot eit standard slitestoff. Maskina tel opp kor mange gnidingar som skal til før det oppstår to trådbrot i stoffet, eller til all luv er borte for luvtekstil. Du kan sjå ein film på YouTube om korleis Martinedale-testen blir gjennomført i eit laboratorium.
Det er forskjell på kor mykje stoffa bør tole, alt etter kvar møblane skal brukast. Derfor kan vi dele inn i ulike kategoriar:
private heimar: lett bruk, mellom 10 000 og 15 000 martindale
kontor: minimum 25 000 til 35 000 martindale
offentlege rom som restaurantar, skular, kino: helst over 50 000 martindale
Ver merksam på at ikkje alle stoff er vaskbare. Det kan òg vere problematisk å velje for lyse fargar til offentlege rom, då desse fort blir skjoldete. Av same grunn kan det vere lurt å velje stoff som er mønstrete eller fleirfarga.
Fibrar som blir brukte i møblar
Ull
Ull er møbelstoffet som blir mest brukt. Ull er naturleg antibakteriell og naturleg flammehemma. Den antibakterielle motstanden kjem hovudsakleg av at svovel er bunde til proteinet i fiberen. På grunn av dette held stoffet seg reinare enn mange andre typar stoff. At ullstoff òg er naturleg flammehemma er ein fordel dersom det blir brukt i offentlege rom der det kan skje hærverk.
Bomull
Bomull blir brukt til trekk ein kan ta av, sidan det fort blir skittent. Bomull blir ofte blanda med ull eller viskose, og bomullsstoff har mindre slitestyrke enn reint ullstoff.
Lin
Lin bør ikkje brukast som møbelstoff fordi det er mindre slitesterkt, krøllar lett og er lite elastisk.
Viskose
Viskose har same bruksområda som bomull, men er svakare dersom det blir vått. Viskosefibrar blir ofte blanda med bomull eller ull.
Nylon
Nylon er slitesterkt og blir derfor blanda med andre fibrar for å auke slitestyrken.
Polyester
Polyester har same eigenskapar som nylon med omtrent same slitestyrke, men polyester krøllar seg mindre enn nylon.
Akryl
Akryl er meir slitesterkt enn ull og krympar ikkje. Det er likevel svært brennbart, og det blir berre brukt i møbelstoff saman med andre fibrar som til dømes ull.
Skinn og kunstlêr
Skinn, og etterlikninga kunstlêr, er gode materiale for møblar fordi dei er slitesterke og enkle å halde reine. Pass likevel på kva type skinn du vel, sidan det er fleire typar som blir stygge dersom dei får fukt eller feitt frå hender og hovudbotn på seg. Du må derfor setje deg godt inn i dei ulike typane skinn før du tilrår dette til ein kunde. Skinn kan òg fåast i lakkert overflate, men denne overflata kan sprekke over tid.
Kunstlêr er ei etterlikning av skinn som er rimelegare å kjøpe. Det er òg svært slitesterkt, men kan likevel få rifter og raknar. Kunstlêr blir ofte brukt i offentlege bygg.
Gjenbruk
Eit møbel kan bli som nytt viss det blir trekt om og dei utslitne tekstilane bytte ut. I filmen under får du innblikk i korleis møbeltapetseraren Sofie Pocock arbeider, og korleis ho tenker om materialval.