Tremateriale i interiør

Bartre

Dei vanlegaste tretypane vi bruker til å bygge med, er furu og gran. Dette kan vere fordi det tradisjonelt sett har vore mykje av desse treslaga i landet vårt. Både furu og gran har vorte mykje brukt til golvplank og panel på vegg. Mange hytter har ofte synleg furu eller gran i romma. Furu og gran er relativt mjuke treslag, og golv i dette trematerialet får ofte hakk og merkar etter skohælar.

Lauvtre

Eik, bjørk, ask, bøk, kirsebær og valnøtt er tretypar som har vorte brukte mykje i inventar. Eik har vore populært dei siste åra. Det blir rekna som ein av dei hardaste tresortane og eignar seg derfor godt som golvmateriale. Eik blir òg brukt mykje i anna inventar.

Valnøtt er eit mørkt treslag. Mange av dei mørke treslaga er regnskogtre. Vi må unngå tremateriale som kjem frå trua skogsområde.

Sidan dei ulike treoverflatene har ulike kvalitetar og fargar, er det smart å sjå på ein heilskap med materiale, fargar og belysning når du planlegg eit interiørforslag. Då må du kunne skilje mellom dei ulike treslaga.