Fagstoff

Setje opp pool og VDev i TrueNAS

TrueNAS bruker ZFS som filsystem og volumhandterar. Dette inneber oppsett av pools og eit eller fleire VDevs for å få på plass lagringa til NAS-et.

Modell som viser tre boksar med overskrifta "ZFS pool". Seks harddiskar er saman i ein boks merkt "VDev0", seks andre harddiskar av ein annan storleik er i ein boks merkt "VDev1". Det er ein tredje boks merkt "Støtte-VDev". Denne har cache- og log-SSD-ar i seg. Illustrasjon. — Diskar (HDD eller SSD) er delar av eit VDev, og VDevs kan setjast saman til eit pool. Bilete: Tron Bårdgård, Rflor, Misbahul Munir / CC BY-SA

Gå til "Storage" i hovudmenyen til venstre, og vel "Pools" i undermenyen som blir opna. "Pool Manager" vil no opnast.

Sette namn på pool

I feltet "Name", som er ganske nært toppen, skriv du inn namnet på poolet ditt.

Velje diskar til Data VDev

Oversikta under er delt i to. Til venstre er ei liste over tilgjengelege einingar ("Available Disks"). Til høgre har du oppretta VDevs.

Webgrensesnitt til TrueNAS, sida "Pool Manager" er open. Skjermbilete. — Bilete: Tron Bårdgård / CC BY-SA

Kryss av for diskane du ønskjer skal vere med i VDev-et ditt. Alle diskane må ha den same storleiken og bør vere like raske. Bruk den vesle høgrepila mellom kolonnane for å flytte diskane over i "Data VDev".

Utklipp som viser tilgjengelege diskar til venstre og diskar som er plasserte i VDev til høgre. Skjermbilete. — Bilete: Tron Bårdgård / CC BY-SA

Sette RAID-Z-variant for VDev

Utklipp som viser liste med "Data VDevs" og tilknytte diskar. Under er ein opna undermeny som viser ulike RAID-Z-variantar. Skjermbilete. — Bilete: Tron Bårdgård / CC BY-SA

I kolonnen til høgre, under dei valde diskane, står det kva RAID-Z-variant som systemet foreslår til dette VDev-et.

Bruk den vesle pila ved sida av forslaget for å få opp ei liste over moglege RAID-Z-variantar.

Viss du er usikker på kva RAID-Z-type du skal velje, kan du lese meir om dette i artikkelen Filsystem, pools og VDevs i TrueNAS (ndla.no).

Vel gjerne dei ulike typane og sjå korleis det påverkar tilgjengeleg lagringsplass ("Estimated raw capacity").

Viss du skal leggje til støtte-VDev

Støtte-VDevs er diskar (som regel SSD) som hjelper heile poolet, som oftast med høgare lesehastigheit frå NAS eller skrivehastigheit til NAS.

For å opprette støtte-VDev bruker du den vesle nedpila som er del av "ADD VDEV"-knappen på toppen. Du vil då få opp ei liste over moglege støtte-VDevs som kan setjast opp.

Under er ei oversikt over VDevs som er mest aktuelle.

Cache

Cache-diskar (SSD-ar) beheld kopi av mykje brukt data. Når filene blir etterspurde, kan dei sendast rett frå dei raskare cache-diskane i staden for meir langsame lagringseiningar.

Log

Log-diskar fungerer som mellomstasjon for data som skal inn i pools. Dei gir raskare og meir effektive skriveoperasjonar.

Obs: Viss du vel meir enn éin disk til log, vil systemet foreslå at du set desse opp i spegling (mirror). Dette gir auka redundans og er derfor tilrådd.

Hot Spare

Hot Spare er ein reserveharddisk som blir sett inn automatisk viss ein harddisk i oppsettet fell ut. Dette kortar ned tida før full redundans kan opparbeidast igjen.

Når du er fornøgd med oppsettet, kan du lagre pool og VDev ved å trykkje på "CREATE"-knappen.

Eit sprettoppvindauge vil kome fram og be om stadfesting på at diskane blir brukte og dermed sletta. Kryss av for "Confirm", og trykk "CREATE POOL".

CC BY-SASkrive av Tron Bårdgård.

Sist fagleg oppdatert 07.07.2021