Hopp til innhald
Rettleiing

Kople opp share i Windows 10

Å kople til ei delt nettverksmappe (share) i Windows er enkelt, og det kan gjerast på fleire måtar. Viss du ønskjer å kople til ein enkelt gong, kan du skrive inn share-adressa i adressefeltet til ei mappe. For permanent bruk er oppmontering av ein nettverksstasjon tilrådd.
Skrivebord til nyinstallert Windows 10. Skjermbilete.
Bilete: Microsoft / Avgrensa bruksrett

SMB 2 \ 3 (Server Message Block) er delingsprotokollane for deling av mapper og filer i lokalnettverk for Windows-datamaskiner. Du kan kople til ei delt nettverksmappe (share) direkte frå adressefeltet i ei mappe på maskina, eller du kan montere (mount) opp delte mapper som ein nettverksstasjon. Det siste alternativet er praktisk for permanente delingar og deling som blir sett opp for brukarar med vanleg eller låg IT-kompetanse.

Kople til ei delt mappe frå adressefelt

Opne ei mappe i Windows, og skriv inn adressa til den delte mappa di. Adressa er utforma som \\IP-adresse\namn på delt mappe. I dømet under er IP-adressa til NAS-serveren 192.168.1.10, og den delte mappa har namnet Lager.

Utklipp av ei mappe på datamaskin, med delt mappeadresse skriven inn i adressefeltet øvst. Skjermbilete.
Bilete: Tron Bårdgård / CC BY-SA 4.0

Det er òg mogleg å bruke domenenamnet til maskina i staden for IP-adressa. Dette er veldig vanleg i aktive driftsmiljø. Dette gjer at byte av serverar og overgang til ny IP-adresse berre krev ei forandring i den interne DNS-serveren.

Du vil no bli spurt om påloggingsinformasjon for den delte mappa. Viss du bruker same brukarnamn og passord på delinga som på Windows-maskina, kan du berre stadfeste passordet og gå vidare.

Skjermvindauge for pålogging av delt mappe i Windows. Skjermbilete.
Bilete: Tron Bårdgård / CC BY-SA 4.0

Viss delinga er tilknytt ein annan brukar eller eit anna passord, trykkjer du "More Choices / Flere valg" og "Connect using different credentials / Kople til ved hjelp av annan legitimasjon".

Trykk "OK" for å logge inn.

Viss du held fram på påloggingsskjermen etter å ha trykt "OK", men ikkje fekk ei feilmelding (som feil passord), prøver du å logge inn på nytt ved å trykkje "OK".

Når pålogginga er gjord, vil den delte mappa opne seg opp. Forsøk gjerne å lage mapper og filer i den delte mappa for å sjå at ho fungerer som planlagt.

Montere delt mappe som nettverksstasjon i Windows

Viss du ønskjer at datamaskina skal ha rask tilgang til ei eller fleire delte nettverksmapper, er det fornuftig å montere desse opp som nettverksstasjonar.

Opne ei mappe og naviger til "This PC / Denne PCen". Vel toppfanen "Computer / Datamaskin". Du vil no få opp ein undermeny som på biletet under. Vel "Map network driver / Koble til nettverksstasjon".

"This PC"-mappe, som på norsk heiter "Denne PCen"-mappe, i Windows. Skjermbilete.
"This PC / Denne PCen" viser aktive partisjonar og einingar. Bilete: Tron Bårdgård / CC BY-SA 4.0

I rettleiaren som blir opna, vel du stasjonsbokstav og skriv inn nettverksplasseringa.

Bruk stasjonsbokstavar mot slutten av alfabetet

I driftsmiljø er det vanleg å bruke stasjonsbokstavar mot slutten av alfabetet for nettverksstasjonar.

Årsaka er at ulike datamaskiner har ulikt tal på partsisjonar og einingar som tek opp stasjonsbokstavar. Desse har prioritet over nettverksstasjonar for stasjonsbokstavane. Blir det konflikt, vil nettverksstasjonen ikkje klare å kople seg opp.

Eit veldig vanleg døme på dette er maskiner som har innebygd multikortlesar. Sjølv om ingen kort, som SD-kort, er kopla til, er stasjonsbokstavar reserverte, ein for kvar type kort multikortlesaren støtter. Dette vil hindre oppmontering av ein nettverksstasjon som prøver å bruke den same stasjonsbokstaven.

Det er derfor tilrådd å bruke stasjonsbokstavar på slutten av alfabetet for nettverksstasjonar.

Utklipp frå konfigurering, viser nedtrekksliste over stasjonsnamn, serverplassering og nokre avkryssingsval. Skjermbilete.
Bilete: Tron Bårdgård / CC BY-SA 4.0

Adressa er utforma som \\IP-adresse\delt mappenamn. I dømet under er IP-adressa til NAS-serveren 192.168.1.10, og den delte mappa har namnet Lager.

Viss du ønskjer at nettverksstasjonen skal kople seg opp automatisk når datamaskina blir logga på, kryssar du av for "Reconnect at sign-in / Koble til på nytt ved pålogging".

Viss den delte mappa sitt brukarnamn og passord er identisk med brukarnamnet og passordet til maskina, treng du ikkje å leggje inn dette. Viss dei er ulike, som er mest vanleg, må du velje "Connect using different credentials / Koble til ved hjelp av annen legitimasjon".

Trykk "Fullfør" for å gå vidare.

Viss du valde å bruke ei anna pålogging, vil du få opp påloggingsvindauge. Fyll ut og vel "Remember my credentials" / "Husk legitimasjonen min". Trykk "OK" for å gå vidare.

Nettverksstasjonen vil no bli kopla opp og vere synleg under "This PC / Denne PCen".

Utklipp frå "This PC", som på norsk heiter "Denne PCen". Nettverksstasjonen kjem opp som ein eigen stasjon. Skjermbilete.
Bilete: Tron Bårdgård / CC BY-SA 4.0
Feil ved pålogging av delt mappe

Viss du får ei feilmelding som liknar den under, betyr dette som oftast at brukarnamn eller passord som vart freista brukt for pålogging til den delte mappa, er feil. Det kan òg bety at rettar ikkje er riktig sette på NAS-serveren. Prøv først å logge inn på nytt, og sjekk deretter brukar- og delingskonfigurasjonen på NAS-serveren.

Utklipp frå feilmelding med tittel "Windows cannot access \\192.168.1.10\Arkiv". Skjermbilete.
Bilete: Tron Bårdgård / CC BY-SA 4.0

Feilmelding ved bruk av riktig brukarnamn og passord

Viss Windows-maskina tidlegare har vore kopla til ei delt mappe frå den same IP-adressa, til dømes at du har måtta setje opp NAS-serveren fleire gonger, kan Windows-maskina ha forelda påloggingsinformasjon. Maskina bruker denne gamle påloggingsinformasjonen sjølv om du skriv inn ny i pålogginga. Derfor må du slette gammal informasjon.

Kommando
1Net Use * /delete

Du vil då få opp ei liste over tilkoplingar som vil bli fjerna. Sjå over, vel "Y / J", og trykk enter.

Utklipp frå leietekst, viser at kommandoen "Net Use * /delete" blir brukt. Skjermbilete.
Bilete: Tron Bårdgård / CC BY-SA 4.0

Etterpå prøver du å logge på på nytt.